SAN FERNANDO, Bukidnon – Mikabat sa P235,000 nga kantidad sa giingong mineral ores ang nasakmit sa kapolisan atol sa checkpoint operation sa Kalagangan Regional Border Control Point (RBCP) sa Sitio Nabunturan, Barangay Kalagangan, San Fernando, Bukidnon, gabii sa Mayo 25,
2026

Sumala sa police report, ang operasyon miresulta sa pagkadakop sa usa ka suspek nga giila
lamang sa alyas “Dan,” 49-anyos, minyo, usa ka job order worker sa Talaingod, Davao del Norte
LGU, ug residente sa maong lugar.
Atol sa inspeksyon, gipahunong sa mga otoridad ang usa ka puti nga SinoTruk dump truck nga
narehistro ubos sa Talaingod Municipal Government, nga nagbiyahe gikan sa San Fernando,
Bukidnon, paingon sa Talaingod, Davao del Norte.
Naobserbahan sa mga pulis ang daghang sako nga gituohang adunay sulod nga mineral ores
sulod sa dump truck. Apan napakyas ang drayber sa pagpresentar sa mga angay nga dokumento
nga magtugot sa legal nga transportasyon niini, hinungdan sa iyang pagkadakop.
Nasakmit sa operasyon ang 47 ka sako sa giingong wala pa maprosesong mineral ores nga
gibanabana og P235,000, lakip ang gigamit nga SinoTruk dump truck.
Ang suspek gipasakaan og kaso tungod sa paglapas sa Republic Act No. 7942 o Philippine
Mining Act of 1995 ug karon anaa na sa kustodiya sa San Fernando Municipal Police Station
alang sa tukmang disposisyon.
Samtang, ang nakumpiskang mineral ores ug ang sakyanan i-turn over sa Mines and Geosciences
Bureau–Department of Environment and Natural Resources Region 10 (MGB-DENR 10) alang
sa imbentaryo, beripikasyon, ug tukmang disposisyon. (melbmadera)