Lima ka establisemento sa Valencia City ug Malaybalay City ang gipadad-an og Show Cause
Order sa Department of Trade and Industry (DTI)-Bukidnon human giingong nagpahigayon sila
og sales promotion pinaagi sa social media nga walay gikinahanglang permit.

Gipakusgan sa DTI-Bukidnon Provincial Office, pinaagi sa Consumer Protection Division
(CPD), ang pagmonitor sa mga online promotional activities tungod sa nagkadaghang negosyo

nga naggamit sa social media sa pag-anunsiyo og mga diskwento, contest ug uban pang
promotional offers alang sa mga konsumidor.
Sumala sa maong buhatan, sa ilang bag-ong monitoring, lima ka establisemento ang giingong
nagpahigayon og sales promotion nga wala pa makakuha sa gikinahanglang permit gikan sa DTI.
Tungod niini, gipadad-an sila og Show Cause Order ug gimandoan nga maghatag og katin-awan
kabahin sa ilang promotional activities ug sa ilang pagsunod sa mga gikinahanglang requirement.
Gipasiugda sa DTI-Bukidnon nga dili mahimong pasangil ang paggamit sa social media o uban
pang online platforms aron malikayan ang mga requirement sa sales promotion. Ang mga
negosyo nga sakop sa maong regulasyon kinahanglang makakuha una sa hustong DTI permit sa
dili pa maglunsad o mag-anunsiyo sa ilang promotional activities.
Matud sa ahensya, kabahin sa mas hugot nga monitoring ang ilang padayong paningkamot sa
pagpalig-on sa pagsunod sa mga lagda sa negosyo ug pagpanalipod sa mga konsumidor nga
moapil sa mga promotional activities.
Gidasig usab sa DTI-Bukidnon ang mga establisemento nga nagplano og sales promotion nga
susihon daan ang mga gikinahanglang requirement ug makakuha sa hustong permit sa dili pa
magpahigayon o mag-anunsiyo sa ilang promosyon.
Gipasabot sa ahensya nga ang pag-isyu sa Show Cause Order kabahin pa lamang sa proseso sa
regulasyon ug naghatag sa mga establisemento og higayon nga ipasabot ang ilang bahin. Dili pa
kini pinal nga desisyon o pagkaplag nga nakalapas sila sa balaod.
Padayon nga palig-onon sa DTI-Bukidnon ang pagmonitor sa mga sales promotion sa tibuok
probinsya, lakip na ang mga gipahibalo ug gipahigayon pinaagi sa social media, isip kabahin sa
pagpanalipod sa mga konsumidor ug pagpalambo sa patas nga pamaligya. (melbmadera)