Magdugang ang gobyerno og P300 milyon nga pondo aron makompleto ang mga gikinahanglang
pasilidad sa Bukidnon Airport sa Barangay Maraymaray, Don Carlos, Bukidnon, alang sa hingpit
nga operasyon niini isip komersyal nga tugpahanan sunod tuig.

Gipahibalo kini ni Executive Secretary Ralph G. Recto atol sa paglusad sa programang “Bawat
Bayan Makikinabang” niadtong Septiyembre 4, 2026, sa Municipal Gymnasium sa Quezon,
Bukidnon.
Ang dugang nga alokasyon magdala sa kinatibuk-ang pondo sa administrasyong Marcos alang sa
tugpahanan ngadto sa P1.66 bilyon, gikan sa P1.36 bilyon nga unang gigahin sukad niadtong
2022.
Sa kinatibuk-an, nakadawat na ang proyekto, nga gisugdan panahon sa administrasyong Duterte,
og P3.17 bilyon nga pondo gikan sa gobyerno.
Gidisenyo ang bag-ong tugpahanan aron makaakomodar og jet aircraft ug makahatag sa
Bukidnon og direktang koneksyon sa kahanginan ngadto sa dagkong sentro sa ekonomiya ug
turismo sa nasud.
Lakip sa mga pasilidad niini ang 2,100-metros ang gitas-on ug 45-metros ang gilapdon nga
runway, duha ka stub taxiway, ug 43,050-square-meter nga apron nga makapahimutang og unom
ka eroplano.
Naglakip usab ang proyekto og 3,600-square-meter passenger terminal building nga
makaserbisyo og hangtod 425 ka pasahero, 2,500-metros nga runway strip, dugang nga mga
istruktura sa tugpahanan ug mga pasilidad alang sa air navigation.
Ang runway gidisenyo usab aron makaakomodar sa mas dagkong komersyal nga eroplano sama
sa Airbus A320 nga kasagarang gigamit sa domestic nga mga ruta.
Matod ni Recto, ilang gisusi ni Senator Juan Miguel Zubiri ang proyekto aron masiguro ang
pagkompleto niini sunod tuig. Tungod sa dugang nga alokasyon, ang kinatibuk-ang pondo alang
sa proyekto mokabat na sa P3.47 bilyon. (melbmadera)