MALAYBALAY CITY, Bukidnon – Nadakpan ang isa ka High-Value Individual (HVI) sa isa ka
hiniusang drug buy-bust operation nga gipahigayon sa mga operatiba sa kapulisan sa Purok 1,
Barangay Colonia, Valencia City, Bukidnon sa kaadlawon sa Hulyo 27, 2026.

Sumala sa police report, ang operasyon nahitabo alas-12:19 sa kaadlawon ug nagresulta sa
pagdakop sa isa ka 27-anyos nga lalaki nga giila isip HVI sa kampanya batok sa ilegal nga droga.
Ang operasyon gipahigayon sa hiniusang pwersa sa Provincial Drug Enforcement Unit, Drug
Enforcement Unit sa Valencia City Police Station, 2nd Provincial Mobile Force Company,
Provincial Intelligence Unit sa Buk PPO, ug City Anti-Drugs Special Unit Team (CADSUT).
Narekober gikan sa suspetsado ang siyam ka heat-sealed transparent plastic sachets nga adunay
puti nga kristalinong substansiya nga gituohang shabu, nga adunay kinatibuk-ang gibug-aton nga
80.5 gramos ug gibanabana nga nagkantidad og ₱547,400.

Lakip usab sa mga nakumpiska ang isa ka dark blue Infinix smartphone, isa ka identification
card, ika itom nga Suzuki Smash motorcycle, isa ka itom nga pouch nga gigamit isip sudlanan sa
droga, ug ₱1,000 nga gigamit isip buy-bust money.
Giandam na sa kapulisan ang kasong paglapas sa Sections 5 ug 11, Article II sa Republic Act
No. 9165 o Comprehensive Dangerous Drugs Act of 2002 batok sa nadakpan nga suspetsado.
Ang mga nakumpiskang drug evidence gidala sa Bukidnon Provincial Forensic Unit sa
Malaybalay alang sa qualitative ug quantitative examination, samtang ang suspetsado nagpabilin
ubos sa kustodiya sa Valencia City Police Station alang sa hustong dokumentasyon ug
disposisyon. (melbmadera)