Kanhi miyembro sa PNP nanigbas sa Manolo Fortich

Central Mindanao Newswatch - local newspaper

Central Mindanao Newswatch – local newspaper

MANOLO FORTICH, Bukidnon – Malampusong naaresto sa mga miyembro sa Manolo Fortich Municipal Police Station ang kanhi member sa Philippine National Police (PNP) sa kasong Frustrated Murder sa gipahigayong operasyon sa Purok 3, Brgy. Kalugmanan, Manolo Fortich, Bukidnon.

Giila ang suspek nga si Eddie Sumihay y Lumigoy, 52, minyo ug residente sa nahisgutang dapit.

Subay sa report sa PRO-10 viber group, ang krimen nahitabo hapon sa Agusto 24, 2020.

Matud sa inisyal nga imbestigasyon sa Manolo Fortich Municipal Police Station, ang biktima nga si Julius Anlagan, naa sa gawas sa iyang balay, giduolan kini sa suspek og gitigbas gamit ang sundang sa walay igong rason.

Ang Biktima nakaangkon og samad tinigbasan sa liog ug kamot. Dali siya gidala sa Bukidnon Provincial Hospital Annex sa Manolo Fortich.

Kahinumdoman nga ang suspek na-discharged sa serbisyo gumikan sa conviction sa kasong murder. Gituohan nga ang suspek adunay gihambin nga depression. Ang suspek ubos sa kustodya sa kapolisan sa Manolo Fortch. (Sean G. Sulugan)

cmn

Read Previous

Motorcycle barrier dili na kinahanglan sa Rehiyon 10

Read Next

Tunghaan sa IPs, FMR gimugna sa Army, LGU Quezon