Mipadayag og lig-on nga pagsupak ang Sangguniang Panlungsod of Valencia City sa bisan unsang impeachment proceedings batok kang Sara Duterte-Carpio pinaagi sa pagpasar sa Resolusyon No. 1147-2026 atol sa regular nga sesyon sa konseho niadtong Mayo 11, 2026

Ang maong resolusyon giduso ni Mauricio Sistoso Jr. uban sa hiniusang suporta sa tanang miyembro sa konseho, isip pagpamatuod sa ilang baruganan alang sa kalig-on ug panaghiusa sa panggamhanan.

Diin sa resolusyon, gipasiugda sa konseho nga wala sila mosuporta sa bisan unsang lakang nga mahimong mosangpot sa impeachment proceedings batok sa bise presidente.

Matud pa sa konseho, ang political stability mahinungdanon aron mapadayon ang malinawon, episyente, ug epektibong paghatag og serbisyo ngadto sa katawhan, ilabi na sa panahon nga gikinahanglan ang lig-on nga liderato ug panaghiusa.

Giila usab sa lokal nga panggamhanan sa Valencia City nga ang responsableng pagdumala, pagrespeto sa demokratikong proseso, ug panaghiusa sa mga lider maoy lig-on nga pundasyon sa maayong serbisyo publiko ug sa padayong kalamboan sa dakbayan. (melbmadera)