Nasakmit sa mga otoridad ang mga abandonadong smuggled cigarettes nga gibanabanaang mokabat og P200,000 ang kantidad atol sa operasyon nga gipahigayon sa Valencia City gabii sa Mayo 8, 2026

Sumala sa report sa kapolisan, nasakmit sa mga personahe sa Valencia City Police Station ug Provincial Intelligence Unit ang mga kontrabando sa Public Market sa Barangay Poblacion human makadawat og impormasyon mahitungod sa presensya sa ilegal nga mga sigarilyo sa maong lugar.

Lakip sa mga nakumpiska ang duha ka kahon nga adunay sulod nga 100 ka ream sa Modern brand cigarettes ug tulo ka kahon nga adunay 150 ka ream sa Red Commando brand cigarettes, nga gituohang gipamaligya nga ilegal sulod sa dakbayan.

Ang mga nasakmit nga produkto anaa na karon sa kustodiya sa imbestigador ug idangop sa City Health Office, Valencia City, alang sa hustong disposisyon ug dugang nga proseso.

Mipadayag usab og pagdayeg si Police Col. Oliver S. Navales, provincial director sa Bukidnon Police Provincial Office, ngadto sa mga miresponde nga personnel sa PNP tungod sa ilang episyenteng operasyon batok sa smuggling activities.

Matud pa niya, padayon pang hugtan sa kapolisan ang kampanya batok sa mga smuggled nga sigarilyo aron mabungkag ang tanang ilegal nga operasyon, makumpiska ang mga peke ug kontrabandong produkto, ug mapanubag sa balaod ang mga responsable niini. (melbmadera)