Patay ang isa ka 50-anyos nga lalaki human giingong giatake gamit ang sundang ug nahulog sa
pangpang sa Barangay Mt. Nebo, Valencia City, Bukidnon.

Base sa report sa Valencia City Police Station, nakit-an ang lawas sa biktima alas-3:40 sa hapon
niadtong Septiyembre 8, 2026, sa isa ka hilit ug kalasangan nga dapit duol sa Mountain View
College ug kilid sa Hydro Manopali River.
Matud sa inisyal nga imbestigasyon, alas-9 sa buntag niadtong Septiyembre 5, gikan sa Lantapan
ang biktima sakay sa motorsiklo padulong sa Valencia aron mopalit og mga utanon. Kauban niya
ang iyang girlfriend ug tulo niini ka anak.
Sa ilang paghunong sa daplin sa dalan sa Mt. Nebo, giingong nakit-an sila sa 45-anyos nga
suspek nga giingong kanhing bana sa girlfriend sa biktima.
Giingong mikanaog ang suspek sa iyang motorsiklo, mibunot og sundang ug giatake ang
biktima. Nakalingkawas kini ug midagan paingon sa daplin sa pangpang, apan nahulog sa
gibana-banang 80 hangtod 100 metros nga kalawmon.
Nikalagiw dayon ang suspek, samtang ang biktima wala dayon makita bisan gipangita sa iyang
mga kauban ug pamilya.
Narekober sa Valencia City Rescue Team ang lawas niadtong Septiyembre 8 ug gidala sa funeral
home alang sa hustong disposisyon. Wala’y nakitang hacked wound o klarong laing samad sa
lawas.
Gimandoan ni Bukidnon Police Provincial Office Director Police Col. Oliver Sotto Navales ang
Valencia CPS nga palalmon ang imbestigasyon ug paningkamotan ang pagdakop sa suspek.
(melbmadera)