Patay ang usa ka lalaki human kini nahulog sa usa ka pangpang nga gibanabanaang mokabat og 100 metros ang kalawmon sa Sityo Upper Sabangan, Barangay Dalirig, Manolo Fortich, Bukidnon, gabii sa Disyembre 30, 2025

Sumala sa report ni Police Lt. Col. Evary E. Bacunawa, hepe sa Manolo Fortich Municipal Police Station, ang mga kadugo sa biktima mao ang unang nakaabot ug nikuha sa 64-anyos nga lalaki gikan sa dapit nga nahulogan niini.

Ang biktima gidala dayon sa miresponde nga rescue personnel sa Manolo Fortich ngadto sa usa ka ospital, apan gideklarar nga patay na sa pag-abot, sumala sa attending physician.

Sa imbestigasyon sa kapolisan, nasayran nga sumala sa asawa sa namatay, pauli na unta sila gikan sa usa ka birthday celebration sa ilang mga kabanay sa Sityo Lower Sabangan, Barangay Dalirig, ug nagbaktas sila sa lapok nga bahin sa karsada.

Apan ang iyang bana, nga ilawom sa impluwensya sa ilimnong makahubog, aksidenteng natumba ug nahulog ngadto sa pangpang, nga miresulta sa iyang kamatayon tungod sa grabeng mga samad nga iyang naangkon.

Sa dugang nga imbestigasyon, nasayran nga walay foul play nga nalambigit sa maong insidente. (Diego M. Hidalgo)