Napalgang patay ang usa ka 65-anyos nga lalaki nga nakit-an na sa pagkadugta sa Manupali River sa Purok 5, Barangay Poblacion, Lantapan, hapon sa Mayo 8, 2026

Sumala sa report sa Lantapan Municipal Police Station, ang biktima nailhang alyas “Momong,” residente sa Purok 4 sa maong barangay, ug giingong walo na ka adlaw nga nawala sa wala pa siya hingkaplagi.

Positibo siyang giila sa iyang half-brother, samtang ang inisyal nga imbestigasyon nagpakita nga ang biktima giingong mikatkat sa kahoy aron mag-ani og dugos gikan sa balay sa putyukan apan aksidenteng nahulog sa bakilid ug mitugpa sa suba.

Ang iyang lawas nakit-an nga nagbuy-od sa kawayan ug partially nga naunlod sa tubig.

Nakig-alayon ang mga personahe sa Lantapan MPS uban sa CVO/BPAT sa Barangay Poblacion ug Municipal Disaster Risk Reduction and Management Office Lantapan alang sa retrieval operation sa lawas sa biktima.

Sumala sa findings sa Rural Health Physician sa Lantapan, posibleng hinungdan sa kamatayon ang secondary sa aksidenteng pagkahulog. (melbmadera)