Gipadayon sa lokal nga panggamhanan sa Valencia City ubos sa liderato ni Amie G. Galario ang pagduso aron mahimong Highly Urbanized City (HUC) ang dakbayan gikan sa kasamtangang first-class component city status niini

Sumala sa city government, ang maong sugyot giduso na ngadto sa Sangguniang Panlungsod of Valencia City ug pagatukion sa umaabot nga mga sesyon.

Gipasiugda sa lokal nga panggamhanan nga ang pag-angkon sa HUC status dili na lamang pangandoy, kundili usa ka pormal nga pag-ila sa Valencia isip lig-on ug progresibong urban center nga dugay nang naghatag og episyenteng serbisyo ug kusog nga kontribusyon sa ekonomiya sa rehiyon.

Gipasabot usab nga ang dakbayan nakapakita og lig-on nga performance sa natad sa ekonomiya, agrikultura, edukasyon, panglawas, ug peace and order, nga nagpalig-on sa kapasidad niini isip usa ka highly urbanized area.

Base sa Section 452 sa Local Government Code of 1991, mahimong ideklarar nga Highly Urbanized City ang usa ka dakbayan kon adunay populasyon nga kapin 200,000 ug tinuig nga kita nga dili moubos sa ₱50 milyon.

Sa presentasyon sa city government, ang Valencia adunay populasyon nga 223,620 ug nakarekord og kapin ₱2.18 bilyon nga annual income niadtong 2025 — kantidad nga labaw pa sa minimum nga gikinahanglan ubos sa balaod. (melbmadera)