Champion ang Malaybalay City sa cultural dance contest sa 29th Aldaw ta Kitanglad celebration nga gipahigayon sa Barangay Lirongan, Talakag, Bukidnon, kaniadtong Nobyembre 4-6, 2025

Matod sa Facebook post sa City Government of Malaybalay, First Runner Up ang munisipyo sa Sumilao ug Second Runner Up ang munisipyo sa Manolo Fortich.

Niining tuiga, ang dakbayan sa Malaybalay gipresentaran sa usa ka talentadong grupo sa mga estudyante gikan sa Barangay Dalwangan, usa sa upat ka barangay sa siyudad nga nahimutang sa tiilan sa Kitanglad Range.

Uban sa dedikasyon ug kadasig, gipakita sa mga performers ang bahandi sa kultural nga tradisyon sa Malaybalay, nga nakapahimuot sa mga nanan-aw pinaagi sa ilang maanindot ug dinamikong mga sayaw.

Ang cultural dance contest ang highlight sa mga nakalinyang kalihokan sa selebrasyon sa 29th Aldaw ta Mt. Kitanglad.

Kini nga prestihiyosong tinuig nga festival, nga ginahimo matag Nobyembre, nagpasidungog sa Mt. Kitanglad Range Natural Park (MKRNP), usa ka ASEAN Heritage Site, ug nagselebrar sa daghang klase sa kinaiyahan ug kultural nga panulundon sa rehiyon.

Ang kalihokan usab nag-ila sa bililhon nga kontribusyon sa Kitanglad Guard Volunteers (KGVs) ug sa mga komunidad sa Indigenous Peoples (IP), ang tinuod nga mga tigbantay sa mahinungdanong ekolohikal nga lugar.

Ang tema sa 29th Aldaw ta Kitanglad Festival — “Padayun sa Panaghiusa Para sa Kalinaw og Kalambuan sa Kinaiyahan ug Kultura” — nagpasiugda sa kamahinungdanon sa pagpalig-on sa panaghiusa sa mga komunidad, pagpanalipod sa kinaiyahan, ug pagselebrar sa kultural nga kalainlain.

Ang Mt. Kitanglad gipalibotan sa Malaybalay City, Impasug-ong, Sumilao, Baungon, Libona, Manolo Fortich, ug Lantapan.

Kini ang ikaupat nga pinakataas nga bukid sa Pilipinas ug adunay gibana-banang kahabogon nga 2,899 metros (9,511 feet).

Kini ang puy-anan sa usa sa pipila na lamang nga nabilin nga rainforest sa Pilipinas.

Apil kini sa ancestral domain sa mga Higaonon, Talaandig, ug Bukidnon nga katawhan. (melbmadra)