Ang Munisipyo sa Manolo Fortich nakatala sa taas nga ihap sa kaso sa coronavirus disease (Covid-19) niadtong Mayo 25.

Sumala sa public advisory sa maong Munisipyo, niabot sa 57 ang natalang kaso sa Covid-19 sa maong adlaw.

Ang 16 kanila symptomatic, 27 mga lalaki, 30 mga babaye, unom ang 60 anyos pataas, ug siyam ang 10 anyos paubos diin ang pinakabata lima ka bulan nga batang lalaki nga residente sa Brgy. Mambatangan.

Ang 12 kanila residente sa Brgy. Tankulan, 10 sa Brgy. Damilag, siyam sa Brgy. Agusan Canyon, ug ang uban gikan sa Brgy. Lunocan, Kalugmanan, Lingion, Sto. Niño, Dicklum, Mambatangan ug San Miguel.

Sa maong adlaw, niabot sa 863 ang kinatibuk-ang kaso sa covid-19 sa maong Munisipyo diin kasagaran sa mga nataptap local residents.

Base sa datos, ang mga aktibong kaso anaa sa 146, ang mga naulian 703 ug 14 ang mga namatay.