Isa ka lalaking negosyante ang gipusil patay buntag sa Setyembre 26, 2025, sa Purok-3A, Barangay Kahaponan, Valencia City, Bukidnon

Sa iyang report, si Police Lt. Col. Bryan M. Panganiban, COP sa Valencia City Police Station, nag-ingon nga ang biktima nailhan sa ulahi sa iyang mga paryente nga isa ka 35-anyos, minyo, ug residente sa dapit.

Ang biktima napalgan nga patay na, nagkulob sa kilid sa probinsyal nga kalsada, duol sa iyang gimaneho nga sidecar motorcycle, nga adunay dugo sa iyang ulo.

Sa dugang pa, nadiskobre sa duty investigator nga adunay mga samad sa ulo ang biktima ug dayon gihangyo ang Provincial Forensic Unit aron motabang sa pagproseso sa crime scene.

Gikolekta usab, pipila ka metro gikan sa crime scene, ang isa ka butang nga gituohan nga cartridge case sa cal. .45 pistol.

Sumala sa kasilinganan, nakadungog sila og duha ka kusog nga buto sa armas sa wala pa nadiskubre ang gidangatan sa biktima.

Gihimo usab sa Valencia CPS ang dragnet ug hot pursuit operations aron posible nga maila ug maikop ang mamumuno.

Gisugo ni Police Col. Jovit L. Culaway, provincial director sa Bukidnon Police Provincial Office, ang Valencia CPS sa pagpatuman sa isa ka husto ug lawom nga imbestigasyon sa maong insidente ug sa pagdakop sa mga responsable aron kini dali nga masulbad. (Diego M. Hidalgo)