Gipirmahan ni Malaybalay City Mayor Jay Warren R. Pabillaran ang Ordinance No. 1078-S-2026 kaniadtong Pebrero 2, 2026, nga nagtukod sa pagpili sa “Most Family-Friendly Barangay” sa siyudad

Sumala sa Facebook post sa City Government of Malaybalay, ang maong ordinansa maghatag og giya sa implementasyon sa search nga nagtumong sa pagpasidungog sa mga barangay nga nagpakita og madasigon ug malungtarong pagpatuman sa mga polisiya ug programa alang sa kaayuhan sa matag pamilya.   Giaprobahan ang ordinansa sa 10th Sangguniang Panlungsod atol sa ika-28 nga Regular Session kaniadtong Enero 27, 2026.  

Ang maong ordinansa giduso ni Konsehal Alan Ryann O. Legaspi, kauban sila Konsehal Kathleen Cecille C. Pagaling ug Konsehal Brian Nelson T. Flores.  

Gitahasan usab sa ordinansa ang City Social Welfare and Development Office (CSWDO) sa pagpangulo sa implementasyon sa programa, ug gipalig-on ang panagtambayayong tali sa CSWDO ug sa mga barangay sa pagpatuman sa mga polisiya ug inisyatiba nga nakatutok sa kaayuhan sa pamilya.  

Lakip sa mga kriterya sa ebalwasyon ang mosunod: Family Welfare Services (30 porsiyento); Child Protection and Women’s Welfare Programs (20 porsiyento); Health, Nutrition and Social Protection Initiatives (20 porsiyento); Safety, Peace and Order Measures (10 porsiyento); Community Participation and Transparency (10 porsiyento); ug Innovation and Sustainability of Programs (10 porsiyento).  

Gilatid usab sa ordinansa ang ubang mga termino, kondisyon, ug giya aron maseguro ang husto ug epektibong pagpatuman sa maong search. (melbmadera)