Padayon pang gi-imbestigahan sa Cabanglasan Municipal Police Station (CMPS) ang pagpamusil patay sa usa ka myembro sa Barangay Public Safety Officer (BPSO) didto sa KM 25, Cabanglasan, Bukidnon, buntag sa Hulyo 21, 2025

Si Police Major Jayvee Babaan, spokesperson sa Bukidnon Police Provincial Office (BPPO), nibutyag niini sa press conference kaniadtong Hulyo 23, 2025.

Nasayran nga ang lalaking biktima giilang usa ka 53-anyos, minyo, laborer, BPSO, kanhing residente sa Munisipyo sa Maramag ug tulo na ka tuig nagpuyo sa Purok 15, Iba, Cabanglasan, Bukidnon.

Ingon ni Babaan nga blanko pa sila sa motibo sa pagpamusil, taliwala nga nasikop ang usa sa duha ka lalaki nga gisuspetsahan sa pagpatay ug napaubos na sa paraffin test.

Gilauman niya nga sa dili madugay, mahatagan og katin-awan ang kaso sanglit nagpadayon pa man ang imbestigasyon.

Ang lalaking suspek nga nakorner sa mga myembro sa BPSO didto sa Purok 8, Brgy. Iba, Cabanglasan, nakatilaw og sipa ug suntok sa pipila ka residente human nakorner sa mga BPSO, sumala sa na-post nga video sa Facebook.

Ang hingkod nga lalaking suspek, nga residente sa Munisipyo sa Maramag, Bukidnon, nihimakak sa alegasyon ug kasamtangan kining anaa sa kustodiya sa Cabanglasan MPS, ingon ni Babaan. (melbmadera)