Ang gakadugtang lawas sa isa ka lalaki napalgan sulod sa septic tank sa Maramag Fish Landing nga nahimutang sa Purok 5A, North Poblacion, Maramag, Bukidnon, sa alas 7:50 sa buntag niadtong Oktubre 11, 2025

Sumala sa report ni Police Lt. Col. Alexander Eugenio, hepe sa Maramag Municipal Police Station, isa ka utility personnel sa Fish Landing ang nakakaplag sa patay’ng lawas ug dayon nitaho sa buhatan sa kapolisan pinaagi sa cellphone.

Ang biktima nailang isa ka 26-anyos nga lalaki, ulitawo, ug trabahante nga nagpuyo gihapon sa maong lugar.

Ang mga unang nagresponde sa dapit nagkordon sa lugar samtang ang imbestigador mitawag og tabang sa Scene of the Crime Operations (SOCO) Team gikan sa Bukidnon Provincial Forensic Unit. Ang SOCO Team miabot alas 9:30 sa buntag ug, uban ang Maramag Rescue Team, malampuson nga nakakuha sa lawas gikan sa septic tank.

Sa inisyal nga inspeksyon, wala’y nakitang timailhan sa foul play. Nakuhà usab gikan sa bulsa sa short pants sa biktima ang iyang Samsung cellphone, pitaka nga adunay ₱600, ug disposable lighter.

Ang mga gamit gihatag sa amahan sa biktima, nga mipositibong nakaila sa patay nga iyang anak.

Sumala sa amahan, katapusan niyang nakit-an ang iyang anak niadtong Oktubre 6, 2025, ug wala na kini mipauli sukad niadto.

Base sa pahayag sa utility personnel, ang tabon sa septic tank manhole kay plastic fiber sheet ra imbis nga konkreto aron mas sayon ang paglimpyo, busa posible nga aksidente lang ang pagkahulog sa biktima ngadto sa tangke.

Ang lawas sa biktima gitransport sa Bukidnon Provincial Hospital – Maramag alang sa dugang nga medikal nga eksaminasyon.

Gisultihan usab ang pamilya kabahin sa opsyon nga ipa-autopsy ang lawas, apan ilang gipili nga dili na. (melbmadera)