Usa ka makasaysayanong kalihokan ang nasaksihan niadtong Oktubre 29, 2025, sa Sitio Mahayag, Barangay St. Peter, Malaybalay City, Bukidnon, diin 167 ka mga kanhing miyembro sa CPP-NPA ang opisyal nga mibalik sa sabakan sa balaod atol sa kalihokan nga gitawag “Panagsabuwa: Paghiusa Alang sa Kalinaw ug Kalamboan.”

Ang maong peace reconciliation gipasiugda sa tradisyunal nga mga ritwal nga Panastas, Panagkila, ug Pamutwa, nga gipangulohan sa Tribal Chieftain sa Malaybalay City.

Kini nagpasabot sa pagpasalamat, pagpanghinlo, ug pagpasig-uli sa panaghiusa tali sa mga tribo ug sa mga kanhing rebelde.

Nagpasabot usab kini sa pagpanday og kasabutan sa kalinaw tali sa Tribal Community, Philippine Army, ug mga kanhing rebelde, nga nagpasabot nga ang tinuod nga kalinaw makab-ot pinaagi sa pagpasaylo, respeto, ug pagkahiusa — dili pinaagi sa armas o kagubot.

Ang seremonya gipangulohan sa 8th Infantry (Dependable) Battalion ubos sa liderato ni Lt. Col. Jeorge R. Jallorina, ilawom sa superbisyon ni Brigadier General Siegfred Tubalado, commander sa 403rd (Peacemaker) Brigade.

Gisuportahan kini sa nagkadaiyang ahensya sa gobyerno sama sa SWERTE Party-list nga gipangulohan ni Congresswoman Arlyn P. Ayon, PENRO, LTO, DAR, TESDA, Local Amnesty Board of Cagayan de Oro City, ug ACDI Multipurpose cooperative.

Sa ilang mga mensahe, sila BGen Siegfred Tubalado, Congresswoman Arlyn Ayon, ug Datu Harry Sumbongan, City Tribal Chieftain, nagpasiugda sa importansya sa pagpasaylo, paghiusa, ug pagsalig sa usag usa isip pundasyon sa malungtarong kalinaw.

Gipanghinaut nila nga magtinabangay ang tanan aron mapalambo ang komunidad ug mapalig-on ang panaghiusa sa mga tribo.

Dugang pa, usa ka kasabotan ang gipirmahan isip simbolo sa panaghiusa ug pagsabot tali sa mga lumulupyo ug mga kanhi rebelde atol sa gihimong ritwal nga Panagsabuwa. Kini nagtimaan sa tinuod nga pagbati sa pagpasayloay, paghiusa, ug pagpadayon sa kalinaw sa komunidad.

Matud pa ni LTC Jallorina, “Kaming mga kasundaluhan, naghatag kami og dako nga pagtahod sa kultura ug tradisyon sa mga Lumad. Dili nato makab-ot ang tinuod nga pagpasig-uli kon dili ta makakat-on mopasaylo ug modawat sa mga nakasala sa ato. Ang tinuod nga reconciliation magsugod pinaagi sa pagsabot ug pagtahod sa lahi-lahi nga identidad, mga prinsipyo, ug tradisyon sa atong mga igsuong Lumad. Pinaagi sa ingon ani nga mga inisyatibo, among gipasabot pag-usab ang among komitment sa peacebuilding nga inklusibo, sensitibo sa kultura, ug nagagikan sa komunidad. (pr)