Nasakmit sa hiniusang operasyon sa kapolisan ang usa ka pistola ug mga bala niini, usa ka hand grenade, ug gidudahang shabu sa raid nga gipahigayon sa Purok 3, Barangay Dalwangan, Malaybalay City, Bukidnon, buntag niadtong Enero 18, 2026

Nakorner sa operasyon ang suspek nga si Miken Roy Ruiz Babela, 44 anyos, minyo, drayber, ug residente sa maong dapit.

Sumala sa report ni Police Lt. Col. Joepet B. Paglinawan, hepe sa Malaybalay City Police Station, nabalor og Php 408,000.00 ang kantidad sa nasakmit nga shabu.

Giandam na batok sa suspek ang kaso alang sa paglapas sa RA 10591 (Comprehensive Firearms and Ammunition Regulation Act), RA 9165 (Comprehensive Dangerous Drugs Act of 2002), ug RA 9516, nga nag-amenda sa Presidential Decree No. 1866 bahin sa unlawful manufacture, sale, acquisition, disposition, importation, o possession sa explosive o incendiary devices.

Ang dinakpan ug ang mga nasakmit gidala sa Malaybalay CPS alang sa tukmang dokumentasyon ug disposisyon. Ang mga nasakmit nga drug items ug .45-caliber pistola gipasa sa Bukidnon Provincial Forensic Unit alang sa qualitative, quantitative, ug ballistic examination. Samtang ang hand grenade anaa sa kustodiya sa Bukidnon Provincial Explosive Ordnance Disposal and Canine Unit (PECU).(melbmadera)