Patay ang drayber samtang angol ang iyang duha ka kauban human mibangga sa punoan sa narra nga kahoy ang usa ka puti nga Fuso self-loader truck sa Sayre Highway sa Lower Purok 1, Brgy. Kisolon, Sumilao, Bukidnon hapon sa Pebrero 13, 2026

Sa imbestigasyon sa Sumilao Municipal Police Station, nasayran nga gikan sa Malaybalay City ang sakyanan padulong sa Cagayan de Oro City. Samtang nag-overtake sa laing sakyanan pinaagi sa gawas nga lane, natagak ang tuo nga ligid sa atubangan sa abaga sa dalan (road shoulder), hinungdan nga nawad-an og kontrol ang drayber ug nakabangga sa usa ka hingkod nga narra nga kahoy.

Tungod niini, nakaangkon og grabeng samad ang drayber ug gihatod sa Sumilao Municipal Health Office apan gideklarar nga dead on arrival sa wala pa kini mahiabot.

Samtang, ang naangol niyang mga kauban nga babaye ug lalaki gidala usab sa Bukidnon Provincial Medical Center sa Malaybalay City alang sa pagpatambal. (melbmadera)