Pormal nga giaprobahan ni City Mayor Jay Warren R. Pabillaran kaniadtong Pebrero 19, 2026, ang Ordinance No. 1082, Series of 2026, nga naglatid sa opisyal nga pag-institutionalize sa Binaki Festival isip tinuig nga kalihukan sa Barangay Aglayan

Sumala sa kasayuran sa City Government of Malaybalay, nakalusot sa konseho ang maong ordinansa atol sa 29th Regular Session kaniadtong Pebrero 3, 2026, nga giduso ni Konsehal Brian Nelson T. Flores.

Gipasiugda sa siyudad ang importansya sa pagpanalipod ug pagpalambo sa lokal nga kultura, kabilin, ug tradisyon, nga nakatampo sa paglig-on sa identidad ug garbo sa komunidad.

Ang Binaki Festival usa ka mahinungdanong kalihukan nga nagpasundayag sa talagsaong selebrasyon sa lokal nga delicacy nga binaki, nga nailhan sa lugar.

Pinaagi sa Ordinance No. 57, Series of 2025 sa Barangay Aglayan, gideklarar ang selebrasyon isip espesyal nga aktibidad aron makadani og mga bisita, mapalambo ang turismo, ug mapakusog ang sosyo-ekonomikong kahimtang sa lugar.

Nagpadayon usab ang hugot nga suporta sa siyudad pinaagi sa paggahin og pondo alang sa maong selebrasyon aron maseguro ang malampusong pagpatuman niini matag tuig. (melbmadera)