Nasakmit ang gidudahang shabu sa team sa Damulog Municipal Police Station (DMPS) sa reyd nga napahigayon sa panimalay sa isa ka lalaking suspek sa Purok 7, Brgy. Macapari, Damulog, Bukidnon, buntag sa Setyembre 27, 2025

Sa report ni Police Captain Marlon C. Subrian, OIC sa Damulog MPS, nasayran nga ang suspek usa ka 48-anyos, minyu, mag-uuma, ug residente sa dapit.

Gawas sa shabu nga adunay presyo nga P2,040.00, nasakmit sab sa kapolisan ang mga armas human sa implementasyon sa search and seizure warrant sa paglapas sa R.A. 10591, kon Comprehensive Firearms and Ammunition Regulation Act, pinetsahan September 25, 2025.

Kini naglangkub sa usa ka kalibre .38 revolver, usa ka homemade shotgun, tulo ka cartridges sa kalibre .38 revolver, upat ka 12-gauge shotshells, holster, ug sling bag.

Ang dinakpan anaa ubos sa kustodiya sa Damulog MPS samtang gihikay na sab batok sa suspek ang kasong paglapas sa R.A. 10591 ug R.A. 9165, kon Comprehensive Dangerous Drugs Act of 2002.

Ang nakumpiskar nga drug item gidala sa Provincial Forensic Unit alang sa qualitative ug quantitative nga eksaminasyon. (Diego M. Hidalgo)