Saturday, April 20, 2024

Tag: Gidunggab

Tawo giduggab sa igsoon sa Kibawe

Posted on by Diego M. Hidalgo

Isa ka lalaki ang gidunggab patay sa iyang manghod didto sa Purok 9, Romagook, Kibawe, Bukidnon

Ang insidente nahitabo gabii sa Marso 26, 2024, sumala kini sa report ni Police
Major Jayvee G. Babaan, OIC sa Kibawe Municipal Police Station.

Ang 31-anyos nga biktima nakaangkon sa grabing samad dinunggaban sa tuong dughan ug tiyan.

Gidala siya sa Bukidnon Provincial Hospital (BPH) sa Kibawe, Bukidnon apan gideklarar siyang patay sa niatiman nga doktor.

Sumala pa, sayong gabii sa maong petsa, samtang tua sa Barangay Pay-as, Kadingilan, Bukidnon, ang duha samtang nagka-inom sa ilimnong makahubog ang nagkalalis nga niresulta sa pagsinumbagay.

Pagkahuman, ang suspek niadto sa panimalay sa ilang ginikanan sa Romagook aron magkuha sa iyang mga sinina.

Ang duha nagkakita didto pag-usab diin gihapak sa biktima ang walang bukton sa suspek gamit ang palwa sa lubi.

Gumikan niini gihublot sa 26-anyos nga suspek ang iyang dalang kutsilyo ug gidunggab ang iyang magulang makaduha ka higayon.

Ang suspek nasikop sa niresponding kapolisan.

Walay pagsinabtanay sa managsoon ang nakitang motibo sa krimen. (Diego M. Hidalgo)

3 minors suspek sa pagpangdunggab sa Malaybalay

Posted on by Diego M. Hidalgo

Tulo ka minor de edad nga lalaki ang gitudlong suspek sa pagpangdunggab patay sa isa 43-anyos nga lalaki sa Zone 7, Brgy. 1, Malaybalay City

Sumala kini sa report ni Police Lt. Col. Julius Clark Prisco Macariola IV, OIC sa Malaybalay City Police Station (MCPS).

Bisan pa sa pagdala sa Bukidnon Provincial Medical Center, gideklarar sa nag-atiman nga mananambal nga namatay ang biktima wala madugay sa pag-abot.

Sa imbestigasyon, nasuta nga mga alas 11:30 sa gabii niadtong Enero 12, 2024, ang biktima kinsa gituhuang hubog ang anaa sa gawas sa iyang pinuy-anan.

Giingon nga ang tulo ka mga menor de edad ang miatubang kaniya sa walay igong rason ug gidunggab siya sa tuong bahin sa iyang liog.

Human sa hitabo, daling misibat ang mga suspek paingon sa wala masayring direksiyon, samtang ang biktima nakadagan pa paingon sa iyang balay aron magpatabang.

Ang Malaybalay CPS mihimo dayon og hot pursuit operation aron masikop ang mga suspek apan wala pay kasayoran sa kalamboan niini sa paghimo ning balita.

Padayon pa nga giimbestigahan sa MCPS ang motibo sa maong pagpanunggab. (Diego M. Hidalgo)

Amahan gidunggab sa Damulog

Posted on by Omar Rashid Z. Abdullah

Isa ka amahan ang gidunggab sa iyang kaugalingong anak sa Barangay Maican, Damulog, Bukidnon

Base sa report sa pulisya, ang insidente nahitabo niadtong Oktubre 29, 2023 sa ala 1:30 sa buntag.

Ang biktima isa ka 48-anyos nga mag-uuma nga residente sa P-4 Maican, Damulog, Bukidnon.

Samtang ang suspek, kinsa anak sa biktima, giila nga isa ka 24-anyos nga watchman sa RNN Construction ug residente sa maong dapit.

Matod sa taho, ang suspek nakig-inom sa mga higala niini sa dihang gipahunong sa pag-inom ug gipapauli kini sa iyang amahan.

Tungod niini, ang suspek nasuko sa iyang amahan ug gisaksak kini gamit ang isa ka 12-inch nga kutsilyo.

Ang suspek naka-angkon og grabe nga samad ug dali kining gidala sa balay tambalanan apan nakabsan na kini sa iyang kinabuhi. (Omar Rashid Z. Abdullah)

Laborer gidunggab sa kainom, patay

Posted on by cmn

Isa ka laborer ang gidunggab sa iyang kainom sa Purok-8, Brgy. Calaocalao, Don Carlos, Bukidnon niadtong Agosto 17, 2023

Ang biktima giila nga si Andy Enora y Lindongan, 52, balo, ug residente sa maong dapit.

Samtang ang suspek giila sab nga si Joselito Retazo y Loria, hingkod, ulitawo, ug residente sab sa maong dapit.

Gitaho nga nag-inom ang biktima ug ang suspek sa dihang nagkalalis kini hinungdan nga gidunggab sa suspek ang biktima sa makadaghang higayon gamit ang hunting knife.

Ang biktima naka angkon sa 11 ka samad dingunggaban ug siya dali-daling gidala sa Bukidnon Provincial Hospital, sa Maramag, Bukidnon apan gideklara nga dead on arrival.

Si Police Maj. Cipriano V. Bazar Jr., OIC sa Don Carlos Municipal Police Station nitaho nga ang suspek uban sa hinagiban nga gigamit gidala na sa kustodiya sa kapolisan alang sa hustong disposasyon. (MG Mayumi B. Madera)

Tawo gidunggab sa igsuon sa Malitbog

Posted on by cmn

Isa ka tawo ang gidunggab sa iyang igsuon sa Sitio Cagascas, Barangay Kalingking, Malitbog, Bukidnon

Sa taho ni Police Lt. Danilo R. Sabordino Jr., OIC sa Malitbog Municipal Police Station nga ang insidente nahigayon niadtong Agosto 06, 2023 sa alas 9:25 sa buntag.

Ang suspek giila nga si Aljun Rabe Lugcon (magulang sa biktima), 25, ulitawo, laborer, ug residente sa maong dapit.

Samtang ang biktima giila nga si Mark Anthony Rabe Lugcon (manghud), 21, ulitawo, ug laborer.

Sumala sa report, ang hubog nga suspek nagkabikil sa iyang igsuon. Ang manghud nila nga si Ariel Lucgon nisulti nga ang duha aduna nay kabikil daan sa mga niaging adlaw.

Gidunggab sa magulang ang iyang manghud gamit ang isa ka guna nga hinungdan nga naka-angkon kini og samad dinunggaban sa baba.

Ang suspek dali-daling milayas human sa insidente.

Gidala ang biktima sa Bukidnon Provincial Hospital-Annex, Malitbog, Bukidnon aron sa pagpanambal.

Ang kapolisan nag andam na sa mga dokumento alang sa pagpasaka og kaso batok sa supek. (MG Mayumi B. Madera)

Inahan, gidunggab sa iyang anak sa Malitbog

Posted on by Diego M. Hidalgo

Isa ka inahan sa Sitio Mabuhay, San Luis, Malitbog, Bukidnon ang gidunggab sa iyang kaugalingong anak niadtong Hunyo 23, 2023

Ang biktima giila nga si Yolanda Laurente Lahimay, 43, balo.
Samtang ang suspek giila nga si Jemboy, Laurente Lahimay, 25, ulitawo.
Sumala sa taho nga nahipos sa Malitbog Municipal Police Station, gikompronta sa biktima ang iyang anak, kinsa anaa ubos sa sa impluwensya sa ilimnong makahubog.
Apan, matud pa, nga ang suspek nasuko.
Human niini, nikuha og sanggot ang suspek ug gitigbas ang biktima nga naigo sa iyang apapangig ug duha ka kamot.
Swerteng nakadagan ang biktima ug nakapangayo og tabang sa ilang silingan ug dali nga nadala sa Rural Health Unit, Poblacion, Malitbog Bukidnon alang sa pagtambal.
Ang kapolisan sa Malitbog nipahigayon og hot pursuit operation ug malampuson nga nasikop ang suspek kinsa anaa na karon sa kustodiya sa kapolisan sa munisipyo. (Diego M. Hidalgo)

Managsuon gipangdunggab sa Kibawe

Posted on by Diego M. Hidalgo

Duha ka managsuon gidunggab sa ilang balay sa Purok-1 Old Kibawe, Kibawe, Bukidnon niadtong Marso 26, 2023

Ang mga biktima giila nga sila Ali Rosell y Catalbas, 45, minyo, driver, ug residente sa Rosario, Agusan del Sur, ug si Isidro Rosell y Catalbas, 49, minyo, taxi driver, ug residente sa Tablon, Cagayan De Oro City.

Si Police Maj. Marvin T. Enciso, OIC sa Kibawe Municipal Police Station nisulti sa iyang report nga ang mga biktima gidunggab sa 12inches nga hunting knife sa suspek.

Ang suspek giila nga si Dominador Lozarita y Madcaw, 46, minyo, ug residente sa Libertad, Old Kibawe, Kibawe, Bukidnon.

Gitaho nga ang suspek gigukod sa mga barangay tanod tungod sa pagdala niini og hunting knife. Ubos sa impluwensiya sa ilimnong makahubog, ang suspek niabot sa pinuy-anan sa mga biktima nga adunay panagtapok sa pamilya ug dayong nanaksak.

Ang mga biktima dayon gidala sa Bukidnon Provincial Hospital-Kibawe ug karon anaa na sa maayong kahimtang. (Diego M. Hidalgo)