SAN FERNANDO, Bukidnon — Duha ka miyembro sa Communist Terrorist Group (CTG) ang boluntaryong mitahan sa pwersa sa gobyerno sa buntag niadtong Disyembre 10, 2025, sa Headquarters sa 1003rd Maneuver Company, Regional Mobile Force Battalion 10 (RMFB 10) sa Sitio Colon, Brgy. Halapitan, San Fernando, Bukidnon.   Giila ang mga misurender nga sila si alyas “Datu,” 58, vice commander sa Squad Dos, Guerilla Front Malayag, Sub-Regional Committee 2, North Central Mindanao Regional Committee; ug alyas “Tata,” 32, supply officer sa samang unit

Sumala sa press release sa Police Regional Office 10, ang duha parehong mga mag-uuma ug residente sa Brgy. Bonacao, San Fernando.  

Si “Datu” nalista ubos sa Periodic Status Report (PSR) para sa 4th quarter sa 2019. Subay niini, ang duha nakahukom sa pagtugyan sa ilang kaugalingon human ang ilang mga pamilya misurender na sa mga awtoridad.   Gi-turn over ni “Datu” ang usa ka M1 Carbine .30-caliber rifle nga adunay defaced markings, duha ka steel magazine, ug 14 ka mga bala, samtang gitugyan ni alyas “Tata” ang usa ka homemade .22-caliber rifle nga adunay magazine.  

Nahimong posible ang pagsurender sa duha pinaagi sa paningkamot sa 1003rd Maneuver Company, RMFB 10, kauban ang mga personahe gikan sa S2 RMFB 10, 1004th MC RMFB 10, San Fernando MPS, 1st ug 2nd Bukidnon PMFC, Bukidnon PIU, ug BUK PIT-RIU 10.  

Anaa na sila sa kustodiya sa 1003rd MC, RMFB 10 alang sa custodial debriefing ug profiling, samtang ang mga misurender nga armas temporaryong gi-secure sa Supply Office sa unit. (melbmadera)