Duha ka high-valued nga kanhing myembro sa New People’s Army, nga nailhan sa alyas nga Shaggy ug Pia, ang pormal nga gitugyan ngadto sa Probinsyal nga Gobyerno sa Bukidnon isip kabahin sa programa sa gobyerno alang sa reintegrasyon ug peacebuilding program

Sumala sa kasayoran, ang turnover ceremony gihimo niadtong Setyembre 5, 2025 sa Headquarters sa 403rd Infantry “Peacemaker” Brigade sa Impalambong, Brgy. 10, Malaybalay City.

Ang kalihokan gipangulohan ni Gobernador Rogelio Neil P. Roque, uban ni Major General Michele B. Anayron Jr., commander sa 4th Infantry “Diamond” Division, ug Brig. General Seigfred C. Tubalado, commander sa 403rd Infantry.

Ang duha ka indibidwal, nga kaniadto adunay importante nga mga papel sulod sa North Central Mindanao Regional Committee sa NPA, boluntaryong nisurender ngadto sa pwersa sa gobyerno niadtong Setyembre 2, 2025.

Sumala pa, ang ilang desisyon sa pag-surrender resulta diretso sa malampusong engkwentro nga gihimo sa 403rd Brigade batok sa liderato sa NCMRC ug mga elemento sa Saldab Complex, nga naglangkob sa mga utlanan sa Malaybalay City ug Impasug-ong, Bukidnon, niadtong Agosto 17, 2025. (melbmadera)