“Lig-on nga komunidad, hayag nga kaugmaon! Nikabat sa 353 ka mga barangay gikan sa 464 sa probinsya sa Bukidnon ang malampusong nakapasar sa 2024 Barangay Anti-Drug Abuse Council (BADAC) Functionality Assessment

Matod sa Facebook page sa Department of the Interior and Local Government (DILG) Bukidnon, kini nga milestone nagpakita sa walay puas nga determinasyon sa atong mga barangay sa pakigbisog batok sa ilegal nga droga ug sa pagpalambo sa isa ka mas himsog, luwas, ug walay droga nga Bukidnon.

Ingon sa DILG Bukidnon, pinaagi sa panaghiusa ug kusog sa pagbarog, magpadayon kita sa pagtukod og mga komunidad nga puno sa paglaum, kahimsog, ug kalambuan alang sa tanan.

Dugang sa DILG Bukidnon, ang matag kalampusan sa barangay isa ka pahinumdom nga ang kolaborasyon sa katawhan ug liderato mao ang yawi sa pagpadayon sa maayong kaugmaon sa Bukidnon.

Kini usab nag-awhag sa tanang residente sa pag-apil ug suporta sa mga programa nga nagpalig-on sa komunidad ug nagtabang sa pagwagtang sa droga sa matag barangay. (melbmadera)