Kaniadtong Agosto 12, 2025, natigayon ang pagtugyan sa Coffee Processing Plant ngadto sa Bayanihan Millenium Multi-Purpose Cooperative (BMMPC) sa Brgy. Pigtauranan, Pangantucan, Bukidnon

Matod sa Facebook page ni Gov. Oniel Roque, kini isa ra sa mga coffee processing plant hub sa Bukidnon ug daghan pa ang umalabut sa umaabot nga mga panahon.

Tinguha sa provincial government sa Bukidnon nga ang Bukidnon mahimo nga Arabica capital sa Pilipinas ug mailhan sa tibuok kalibutan isip isa sa labing maayong lugar sa kape.

Ang Green Coffee Beans Processing and Marketing nga proyekto nagtinguha sa paghimo og taas nga kalidad nga green coffee beans, ug ang pagdumala niini pagahimoon sa BMMPC nga naglangkob sa 522 ka mag-uuma nga lalaki ug babaye.

Ang subproyekto nagtinguha sa pagpalapad sa operasyon, paghatag og dugang trabaho, pagtaas sa kita sa mga mag-uuma, pag-stabilize sa presyo sa farmgate, ug pagpalapad sa membership.

Karon, ang BMMPC nagkonsolida sa red cherries ug nagproseso niini ngadto sa green coffee beans (GCB) alang sa paghatud sa Nestlé Philippines.

Dugay na nga nag-produce ang BMMPC og premium nga Robusta ug Arabica (Typica, Catimor) nga beans nga gikan sa mga miyembro ug dili miyembro. (melbmadera)