Isa ka 34-anyos nga babaye ang gipusil sa wala mailhing lalaking suspek sulod sa iyang tindahan sa Purok 5, Kiorob, Barangay Talahiron, Kibawe, Bukidnon gabii sa Pebrero 9, 2026

Sumala sa report sa kapulisan, naigo ang biktima sa tuo nga aping diin ang bala milapos paingon sa liog ug wala nga abaga.  

Base sa imbestigasyon, anaa ang biktima sa sulod sa iyang sari-sari store sa dihang miduol ang suspek ug kalit nga nipusil gamit ang usa ka handgun.   Gidala dayon sa pamilya ang biktima ngadto sa Bukidnon Provincial Hospital–Kibawe alang sa medikal nga pagtagad, ug karon anaa sa stable nga kondisyon.  

Nabawi sa crime scene ang usa ka fired cartridge case sa .45 caliber nga pistola nga adunay marka nga “RAM.”  

Usa ka menor de edad nga silingan sa biktima mitug-an nga ang suspek nagsul-ob og itom nga jacket, cargo shorts, ug itom nga cap. Human sa pagpamusil, nagdali kini og kalagiw nga nagbaktas padulong sa sidlakan.  

Padayon ang follow-up nga imbestigasyon sa Kibawe Municipal Police Station. Ang Kibawe MPS nihangyo usab nga i-activate ang OPLAN SHIELD aron mapadali ang pag-ila ug pagdakop sa suspek ug masulbad dayon ang kaso. (melbmadera)