Gipahigayon niadtong Marso 1, 2026 ang inagurasyon sa 12-megawatt Mangima Hydroelectric Power Plant (HEPP) nga nahimutang sa Barangay Dalirig, Manolo Fortich, Bukidnon

Sumala sa press release sa Provincial Government of Bukidnon, gibutyag ni Governor Rogelio Neil P. Roque nga ang pagdugang sa 12-megawatt nga suplay sa kuryente magpalig-on sa power supply alang sa mga panimalay, eskwelahan, ospital, ug lokal nga mga negosyo. Matod niya, mahinungdanon kini sa pagtubo sa ekonomiya, pagdani sa mga pamuhunan, ug pagmugna og dugang nga mga trabaho, samtang nagpauswag usab sa adlaw-adlaw nga kinabuhi sa mga pamilya ug komunidad.

Gipasalamatan sa gobernador si Senador Juan Miguel F. Zubiri, presidente sa Mangima Hydro Power Corp., sa pag-umol sa inisyatiba ug sa paghimo niini nga realidad, ilabi na sa pagpalambo sa malungtarong imprastraktura sa lalawigan.

Gipasabot ni Sen. Zubiri ang importansya sa locally produced energy, nga makatabang sa pagpanalipod sa nasud batok sa epekto sa geo-political hazards, tungod kay mas lig-on ang enerhiya nga gikan mismo sa lokal nga produksyon.

Samtang, gipadayag ni Department of Energy Secretary Sharon S. Garin ang kalipay sa ilang ahensya sa maong kalampusan, nga sumala kaniya nagpakita sa padayon nga pagduso sa clean energy transition ug sa papel sa Mindanao isip posibleng major energy contributor sa umaabot.

Nitambong usab sa kalihokan si Bukidnon Vice Governor Clive Quiño ug Manolo Fortich Mayor Rogelio Quiño, uban sa ubang lokal nga mga opisyal.

Ang Mangima HEPP nahimutang sa mga barangay Tankulan, Dalirig, ug Lingion sa Manolo Fortich, ug nagrepresenta sa dakong lakang sa renewable energy landscape sa Mindanao. Gidisenyo kini aron magamit ang natural nga tinubdan sa Mangima River, nga naghatag og limpyo ug makanunayon nga kuryente alang sa nagkadako nga panginahanglan sa rehiyon ug sa kasikbit nga mga komunidad ug industriya. (melbmadera)