Gipahigayon niadtong Pebrero 26, 2026 ang 2026 Tax Campaign Kick-Off Program sa Bureau of Internal Revenue (BIR) Revenue District Office 99 sa People’s Hall sa Malaybalay City, Bukidnon

Sumala sa press release sa Provincial Government of Bukidnon, nitambong sa maong kalihokan si Governor Rogelio Neil P. Roque uban ni Malaybalay City Mayor Jay Warren R. Pabillaran.

Gibutyag ni Roque nga, sumala sa report ni Mampay U. Pangcoga, revenue district officer sa BIR RDO No. 99-Bukidnon, mikabat sa ₱3.66 bilyon ang nakolektang Income Tax Return (ITR) sa miaging tuig.

Nasayran usab nga ang probinsya sa Bukidnon nakadawat og kapin ₱5 bilyon nga National Tax Allotment gikan sa nasudnong panggamhanan.

Gipasalig sa gobernador nga magpadayon ang panggamhanang probinsyal sa paghatag og hingpit nga suporta sa BIR sa pagpalambo sa transparency, pagka-maakuhon, ug maayong serbisyo publiko. Giingon niya nga padayon usab nilang panalipdan ang kultura sa responsable nga pagbayad sa buhis isip kabahin sa pagtukod og mas progresibo ug malungtarong Bukidnon alang sa tanan. (melbmadera)