Nasikop sa hiniusang operasyon sa Philippine Drug Enforcement Agency Region 10 Bukidnon Provincial Office ug kapolisan ang usa ka gidudahang drug personality atol sa buy-bust operation nga gipahigayon sa Manolo Fortich buntag sa Mayo 6, 2026

Giila sa PDEA ang nadakpan nga Regional Target Listed individual nga si “Ombra,” 59-anyos ug residente sa Purok Upper Susohon, Barangay Tankulan sa maong lungsod.

Nasakmit gikan kaniya ang lima ka sachet sa gituohang shabu sa nagkalain-laing gidak-on nga gibana-banang motimbang og 16 gramos ug adunay street value nga mokabat sa P102,000, lakip ang pakete sa sigarilyo, coin purse, brown nga pitaka, disposable lighter, lisensya sa pagmaneho, ug buy-bust money.

Gipasakaan na og kaso ang suspetsado tungod sa kalapasan sa Section 5 ug Section 11, Article II sa Comprehensive Dangerous Drugs Act of 2002.

Sumala sa mga otoridad, ang maong operasyon kabahin sa gipakusgan ug padayon nga kampanya sa PDEA ug mga kaubang ahensya sa gobyerno batok sa ilegal nga droga aron mabungkag ang mga sindikato ug mapalig-on ang kalinaw ug kaluwasan sa komunidad. (melbmadera)