Saturday, January 18, 2025

Author: Diego M. Hidalgo

Kalabera sa tawo napalgan sa Kadingilan

Posted on by Diego M. Hidalgo

Nadeskubri ang kalabera sa Sitio Tipokol, Brgy. Cabadiangan, Kadingilan, Bukidnon udto sa Enero 15, 2025

Ang Kadingilan Municipal Police Station gipahibalo sa Kadingilan Municipal Disaster Risk Reduction and Management Office (MDRRMO) kabahin sa nadeskubri.


Sumala sa report sa kapolisan, ang pelvic ug mga bukog sa paa na lang ang nakuha, lakip ang short pants nga gituohang gisuot sa biktima.


Ang asawa sa biktima, sa pagtan-aw sa sapot, gilayon nga gikumpirma nga ang shorts iya sa iyang bana.
Ang biktima naila sa ulahi nga 39-anyos ug residente sa Sitio Tipokol, Brgy. Cabadiangan.


Sa pasiunang imbestigasyon, nasayran nga posibleng nahulog gikan sa pangpang ang biktima, kinsa gidudahang lango sa ilimnong makahubog atol sa hitabo.


Wala’y nakit-an nga timailhan sa foul play, ug ang insidente determinadong isa ka aksidente nga nahitabo sa biktima. (Diego M. Hidalgo)

2 Babayeng Drug Pushers Gisikop

Posted on by Diego M. Hidalgo

Nasikop sa kapolisan ang duha ka babaye sa buy-bust operation gabii sa Enero 12, 2025, sa Purok 1, Brgy. Bangcud, Malaybalay City, Bukidnon

Ang duha, kinsa newly identified drug suspects, nag-edad og 37 ug 43-anyos.


Nasikop sila sa mga membro sa Malaybalay CPS, Bukidnon PIU, ug Bukidnon PPO.


Nibalor sa Php 39,032.00 ang kantidad sa shabu nga nasakmit sa kapolisan.


Nakuha usab sa kapolisan ang P500.00 nga buy-bust money gikan sa mga suspek.


Gidala ang nasikop nga mga suspek uban sa mga ebidensya sa Malaybalay CPS alang sa saktong disposisyon.


Pagkahuman, ang mga ebidensya giduso ngadto sa Provincial Forensic Unit para sa qualitative ug quantitative nga eksaminasyon.


Mga kaso sa paglapas sa Seksyon 5 ug 11, Art. II sa R.A. 9165 ang giandam na batok sa mga dinakpan nga suspek. (Diego M. Hidalgo)

Babaye gipusil sa Maramag

Posted on by Diego M. Hidalgo

Dideklarang patay na sa wala pa makaabot sa Bukidnon Provincial Hospital (BPH) Maramag ang 46-anyos nga babaye human gipusil sa Purok 8, Brgy. San Miguel, Maramag, Bukidnon hapon sa Enero 10, 2025

Ang babayeng biktima usa ka minyo, mag-uuma, ug residente sa Purok 4, Brgy. San Carlos, Maramag, Bukidnon.


Sumala sa kasayoran sa kapolisan sa Maramag, ang biktima sakay sa multicab pickup-type nga gimaneho sa usa ka lalaki ug uban sa laing babaye.


Ang sakyanan nagdagan gikan sa BUSCO, Quezon, Bukidnon padulong sa Purok 4, Brgy. San Carlos, Maramag, Bukidnon.


Sa ilang pag-abot sa dapit sa nahitaboan, giingong gipusil ang biktima sa duha ka wala mailhing lalaki nga suspek.


Ang biktima nakaangkon og grabing samad tungod sa pinusil sa likod ug gidala kini sa ospital apan patay na sa wala pa makaabot.


Ang mga suspek giingong niikyas human sa krimen sa wala masayri nga direksyon.


Narekober sa lugar sa nahitaboan ang duha ka fired cartridge cases sa kalibre .45 ug sulod sa sakyanan nakaplagan usab ang duha ka bala nga wa pa matinong kalibre.


Ang Maramag MPS nagpadayon sa imbestigasyon aron mailhan ang mga suspek ug masuta ang motibo sa maong insidente. (Diego M. Hidalgo)

Drug suspek, 2 nga nag-pot session nakorner sa Manolo Fortich

Posted on by Diego M. Hidalgo

Isa ka drug suspek ang nakorner sa buy-bust operation ug aktong nasapnan ang duha ka mga kauban niini nga nag-pot session sa Purok Upper Pol-oton, Brgy. Tankulan, Manolo Fortich, Bukidnon, buntag sa Enero 6, 2025

Sumala sa report sa kapolisan, ang unang suspek nga nasikop nisulay pa sa pagsibat apan nasugpo ra sa kapolisan.


Pagkahuman niini, nadiskubrehan sa kapolisan sulod sa establishment ang duha ka mga kauban sa suspek nga nag-pot session.


Nasakmit sa kapolisan ang Php 16,932.00 nga kantidad sa gidudahang shabu lakip ang drug paraphernalia gikan sa mga suspek.


Kasong paglapas sa RA 9165, o Comprehensive Dangerous Drugs Act of 2002, ang giandam batok sa mga dinakpan nga suspek.


Gidala sa Regional Forensic Unit ang mga nakumpiskang droga para sa qualitative ug quantitative examinations. (Diego M. Hidalgo)

Drug suspek nakigpinusilay sa kapolisan sa Maramag

Posted on by Diego M. Hidalgo

Nakigpinusilay ang usa ka drug suspect sa kapolisan atol sa buy-bust operation nga nahitabo sa Purok 4B, Sitio San Carlos, Brgy. Kuya, Maramag, Bukidnon, hapon sa Enero 7, 2025

Sumala sa report sa kapolisan, atol sa operasyon, ang lalaking suspek nga giila nga 40-anyos, minyo, mag-uuma ug residente sa Purok 4B, Sitio San Carlos, Kuya, Maramag, Bukidnon nakabantay nga nakig-atubang siya sa usa ka pulis, hinungdan nga nibunot siya sa iyang mubo nga armas ug nipusil sa pulis. Kini nagresulta sa pag-bawos sa back-up arresting officer, nga nipusil balik ngadto sa suspek. Maayo nalang kay wa maunsa ang suspek ug ang poseur buyer.


Ang suspek mitahan sa iyang kaugalingon ug nasikop usab ang iyang kauban nga 37-anyos nga babaye, minyo, walay trabaho, ug residente sa Purok 4B, Sitio San Carlos, Kuya.


Nikabat sa Php 88,400.00 ang balor sa nasakmit nga gidudahang shabu gikan sa mga suspek.


Nasakmit sab gikan sa lalaking suspek ang usa ka kalibre .45 Colt pistol nga adunay magazine assembly nga kargado sa tulo ka bala ug laing isa pa ka magazine sa maong armas.


Ang mga dinakpan nga suspek, uban sa mga nasakmit ug nakumpiskang ebidensiya ug mga narekober nga fired cartridges, gidala sa Maramag MPS alang sa dokumentasyon ug saktong disposisyon.


Samtang ang mga ebidensiya sa droga ug mga armas nga nakumpiska itugyan ngadto sa Provincial Forensic Unit alang sa eksaminasyon.


Kasong kalapasan sa RA 9165 ug RA 10591 ang giandam alang sa inquest proceedings sa mga suspek.
Ang hiniusang puwersa sa kapolisan, gilangkoban sa mga yunit gikan sa Maramag Municipal Police Station ug Bukidnon 2nd Provincial Mobile Force Company. (Diego M. Hidalgo)

PDL nagbitay sa CR sa BJMP

Posted on by Diego M. Hidalgo

Isa ka 31-anyos nga lalaki nga Person with Deprived Liberty (PDL) ang gikatahong naghikog sulod sa comfort room sa iyang selda sa Bureau of Jail Management and Penology (BJMP) sa Malaybalay City, Bukidnon

Pasado alas 5:00 sa hapon niadtong Enero 1, 2025, nadiskobrehan sa trustee ang gidangatan sa biktima.


Sumala sa pasiunang imbestigasyon, usa ka habol ang gihigot sa iyang liog, nga nakahikot usab sa steel grills sulod sa comfort room sa iyang selda.


Giingong nag-antos sa sakit sa pangisip ug nakasinati og hallucinations ang namatay.


Dugang pa nga nisuway na kini sa paghikog kaniadto apan napugngan sa mga personahe sa BJMP. (Diego M. Hidalgo)

84-anyos gisikop sa kasong rape

Posted on by Diego M. Hidalgo

Isa ka 84-anyos nga lalaki ang gisikop gumikan sa kasong rape sa Purok 14, Brgy. Bagontaas, Valencia City, Bukidnon udto sa Agosto 25, 2024


Isa ka 84-anyos nga lalaki ang gisikop gumikan sa kasong rape sa Purok 14, Brgy.
Bagontaas, Valencia City, Bukidnon udto sa Agosto 25, 2024.

Siya nailang si Francisco Labores y Bedrijo, minyo, residente sa dapit.

Sumala sa report ni Police Lt. Col. Mitchel Clemencio, OIC sa Valencia City Police Station, nasikop ang akusado human sa 13 ka tuig nga pagtagotago.

Gisikop si Labores pinasubay sa standing warrant of arrest sa kasong rape nga nakadokit sa kaso kriminal numero 18936-08 pinetsahan Mayo 27, 2011 nga walay piyansa.

Sa pagkutlo ning balita, ang akusado ubos sa kustodya sa kapolisan sa Valencia. (Diego M. Hidalgo)

2 gipandunggab sa Baungon

Posted on by Diego M. Hidalgo

Duha ka mga lalaki ang gipandunggab sa pre-wedding occasion sa Purok 7, Brgy. Pualas, Baungon, Bukidnon hapon sa Agosto 25, 2024

Sumala sa report ni Police Major Melchor Saraus. Jr., OIC sa Baungon Municipal Police Station, ang mga biktima isa ka 37-anyos ug 25-anyos samtang ang suspek isa ka 33-anyos nga lalaki.

Ang mga biktima nag-inom sa ilimnong makahubog sa dihang nahiabot ang suspek nga ilang giaagni nga moapil kanila.

Nahitabo ang panaglalis tali sa mga biktima ug suspek.

Gikatahong niadto sa kusina ang suspek, nikuha og kutsilyo dayong dunggab sa mga biktima ug nisibat.

Ang mga biktima gidala sa Northern Mindanao Medical Center sa Cagayan de Oro City.

Apan ang 37-anyos namatay pipila ka oras gumikan sa grabing samad dinunggaban sa walang bahin sa tiyan samtang ang kauban niini ang nagpabilin sa maong ospital.

Walay pagsinabtanany tali sa suspek ug mga biktima ang nakitang motibo sa krimen. (Diego M. Hidalgo)

12 paresan misalmot sa Tribal mass wedding

Posted on by Diego M. Hidalgo

Dose ka paresan sa Indigenous Peoples (IPs) ang nisalmot sa tribal mass wedding nga gipahigayon niadtong Agosto sa Covered Court sa Barangay Sumpong sa Malaybalay City, Bukidnon

Sumala sa kasayoran sa local government unit sa Malaybalay, ang kalihokan isa ka highlight sa “Araw ng Barangay Sumpong.”

Gitumong kini aron mapormal ang panaghiusa sa mga magtiayon nga nag-ipon na isip bana ug asawa.

Ang seremonyas gihimo subay sa naandang mga balaod, ritwal, ug tradisyon sa mga magtiayon, sumala sa gilatid sa Republic Act 8371 kon Indigenous Peoples Rights Act.

Si Datu Danny Sarito ang nangulo sa kasal, uban sa tabang ni Bae Inatlawan – Adelina Tarino ug Datu Chepin Jose Gumindan.

Gitinguha usab sa kalihokan nga masiguro nga ang mga magtiayon maka-access sa mga importanteng programa sa gobyerno, sama sa 4Ps (Pantawid Pamilyang Pilipino Program) ug PhilHealth.

Si City Mayor Jay Warren R. Pabillaran, uban sa mga sakop sa Sangguniang Panlungsod, mga opisyal sa barangay, ug nagkalain-laing lider sa tribo, nitambong sa seremonyas aron pagpakita sa ilang suporta.

Anaa ang City Civil Registrar’s Office aron motabang sa pagpirma sa mga sertipiko sa kaminyoon, pagsiguro sa legal nga pag-ila sa ilang kaminyoon. (Diego M. Hidalgo)

2 babaye nakorner sa buy-bust sa Maramag

Posted on by Diego M. Hidalgo

Nasikop sa kapolisan ang duha ka babayeng newly identified drug suspects sa buy-bust operation sa Purok 6, Brgy. Basecamp, Maramag, Bukidnon sa niaging semana

Ang mga suspek nag-edad 40 ug 50 anyos, sumala sa report ni Police Lt. Col. Bryan M. Panganiban, OIC sa Maramag Municipal Police Station.

Nakuha gikan sa mga babayeng suspek ang duha ka pakite sa gidudahang shabu nga adunay street value nga P34,000.00, lima ka selpon ug P500 cash.

Kasong paglapas sa RA 9165 o Comprehensive Dangerous Drugs Act of 2002 ang giandam na batok sa mga dinakpan.

Gidala sa Provincial Forensic Unit 10 sa Malaybalay City ang mga nakumpiska nga druga alang sa qualitative ug quantitative examinations. (Diego M. Hidalgo)