Nakighiusa ang probinsya sa Bukidnon sa paglusad sa Nationwide Simultaneous Clean-up Drive o gitawag nga Barangay and Kalinisan Day (BarKaDa)

Base sa pahibalo sa LGU Bukidnon, ang maong kalihukan gilusad sa tibuok nasud sa Pilipinas niadtong Setyembre 16, 2023.

Ang BarKaDa isa ka nationwide community-based clean-up drive program nga gitumong sa pagmentinar ug paghatag og himsog ug luwas nga palibot ug pagpugong sa pagkaylap sa mga sakit pinaagi sa hustong solid waste management.

Pinasikad sa Memorandum Circular 2023-133, ang maong kalihukan gipahigayon subay sa tema nga: “Buhayin ang Diwa ng Bayanihan; Mag-volunteer Tayong Lahat para sa Kalikasan”.

Matod sa impormasyon sa The Freeman, ang Department of Interior and Local Government (DILG) nag-ingon nga ang maong kalihukan gilusad subay sa panawagan ni Presidente Ferdinand “Bongbong” R. Marcos, Jr. alang sa “bayanihan”.

Sa sayo pa, si DILG Secretary Benjamin “Benhur” Abalos Jr. niisyu og Memorandum Circular nga nag-awhag sa mga barangay nga mopasar og ordinansa o resolusyon nga mag-gahin og isa ka adlaw sa isa ka semana isip BarKaDa.

Dinhi sa dakbayan sa Malaybalay, adunay 23 ka mga stations ang natumbok nga area nga gilimpyohan ug gilantaw nga mamentinar.

Gilauman nga mapalawig sa mga barangay sa nasud ang paglusad niini sa matag semana, pinaagi sa pakig-partner sa nagkadaiya nga organisasyon ug pribadong sektor. (MG Mayumi B. Madera)