Panid Bisaya
0

Share this post?
Nadakpan sa kapulisan ang isa ka 42-anyos nga lalaki nga giklasipikar nga Top 1 Most Wanted
Person sa municipal level sa Sumilao sa kasong murder ug duha ka ihap sa frustrated murder sa
isa ka operasyon sa Barangay Camaman-an, Cagayan de Oro City niadtong Nobyembre 16,
2026.
Giila sa kapulisan ang dinakpan nga isa ka minyo ug residente sa Barangay Lumbo, Valencia
City, Bukidnon.
Matod sa Bukidnon Police Provincial Office (Buk PPO), nadakpan si Inda sa palibot sa
Carmelite Church pinaagi sa warrant of arrest nga giisyu niadtong Nobyembre 18, 2022.
Walay gitakdang piyansa alang sa kaso sa murder, samtang P200,000 ang piyansa sa matag ihap
sa frustrated murder.
Gipahigayon ang operasyon alas 8:10 sa gabii sa mga personahe sa Sumilao Municipal Police
Station ug 1st Provincial Mobile Force Company, uban sa Provincial Intelligence Unit sa Buk
PPO, Bukidnon Provincial Intelligence Team-Regional Intelligence Unit 10 ug Police Station 2
sa Cagayan de Oro City Police Office.
Human sa pagkadakop, gidala ang suspek sa kustodiya sa Sumilao Municipal Police Station
alang sa dokumentasyon ug hustong disposisyon.
Gidayeg ni Buk PPO Provincial Director Col. Oliver S. Navales ang mga personahe nga miapil
sa operasyon ug gipasiugda ang kamahinungdanon sa kooperasyon sa komunidad sa pagmintinar
sa kalinaw ug seguridad sa probinsya.
Ang report naggikan kang Capt. Arlie S. Cardinal, officer-in-charge sa Sumilao Municipal Police
Station. (melbmadera)
Latest Article