Sa padayon nga paningkamot sa pagpalig-on sa kolaborasyon tali sa mga ahensya sa gobyerno, ang Department of the Interior and Local Government (DILG) Bukidnon, pinangulohan ni Cluster Head Glenda Hope A. Beley, nagpatawag og coordination meeting niadtong Oktubre 14, 2025, sa DILG Provincial Office, Malaybalay City, Bukidnon

Sumala sa Facebook post sa DILG Bukidnon, ang maong miting gitambongan sa mga representante gikan sa 88th Infantry Battalion (IB), 89th IB, Provincial Social Welfare and Development Office (PSWDO), ug Provincial Legal Office (PLO) aron hisgutan ang mga isyu ug kabalaka kalabot sa Former Rebels (FRs).

Ang panag-istoryahanay nagpunting sa mga hagit ug kabag-ohan sa pagpatuman sa Enhanced Comprehensive Local Integration Program (ECLIP), lakip ang legal nga dokumentasyon, paghatud sa programa, ug mga mekanismo sa suporta alang sa mga FR.

Nagpaambit usab ang mga partner agencies sa ilang mga kasinatian, maayong praktis, ug mga sugyot nga lakang aron mapauswag ang paghatud sa serbisyo ug masirado ang mga kakulangan.

Ang maong panagsa nga inisyatibo nagpakita sa panaghiusa ug tinguha sa mga institusyon sa gobyerno ug militar sa pagsiguro sa epektibong pagbalik sa mga FR ngadto sa katilingban.

Pinaagi sa panag-uban ug mas lig-on nga koordinasyon, nagtinguha ang grupo nga maghatud og tukma ug husto nga mga interbensyon alang sa malinawon ug produktibong pagbag-o sa kinabuhi sa mga FR.

Ang kalihukan naglig-on sa panaghiusa ug determinasyon sa tanang ahensyang naapil aron ipadayon ang kalinaw ug kalamboan sa probinsya pinaagi sa padayon nga pagsuporta sa proseso sa reintegrasyon sa mga kanhing rebelde ug sa pagpanday og mas inklusibo ug lig-on nga komunidad. (melbmadera)