“𝐼 𝑐𝑜𝑛𝑠𝑖𝑑𝑒𝑟 𝑛𝑢𝑡𝑟𝑖𝑡𝑖𝑜𝑛 𝑎𝑠 𝑡ℎ𝑒 𝑐𝑜𝑟𝑛𝑒𝑟𝑠𝑡𝑜𝑛𝑒 𝑜𝑓 𝑎𝑙𝑙 ℎ𝑒𝑎𝑙𝑡ℎ 𝑝𝑟𝑜𝑔𝑟𝑎𝑚𝑠. 𝑃𝑎𝑔 𝑛𝑎𝑤𝑎𝑙𝑎 𝑎𝑛𝑔 𝑐𝑜𝑟𝑛𝑒𝑟𝑠𝑡𝑜𝑛𝑒, 𝑒𝑣𝑒𝑟𝑦𝑡ℎ𝑖𝑛𝑔 𝑐𝑟𝑢𝑚𝑏𝑙𝑒. 𝑆𝑜, 𝑡ℎ𝑎𝑡’𝑠 ℎ𝑜𝑤 𝑖𝑚𝑝𝑜𝑟𝑡𝑎𝑛𝑡 𝑛𝑢𝑡𝑟𝑖𝑡𝑖𝑜𝑛 𝑖𝑠 𝑠𝑎 ℎ𝑒𝑎𝑙𝑡ℎ 𝑝𝑟𝑜𝑔𝑟𝑎𝑚. 𝐼𝑛 𝑒𝑣𝑒𝑟𝑦 𝑎𝑠𝑝𝑒𝑐𝑡 𝑜𝑓 ℎ𝑒𝑎𝑙𝑡ℎ, 𝑛𝑢𝑡𝑟𝑖𝑡𝑖𝑜𝑛 𝑖𝑠 𝑣𝑒𝑟𝑦 𝑖𝑚𝑝𝑜𝑟𝑡𝑎𝑛𝑡.”

Mensahe kini sa pakigpolong ni Dr. Jose Rhoel De Leon, Bukidnon Provincial Health Sector Overseer, ang nagrepresenta kang Governor Rogelio Neil P. Roque sa gilusad nga Barangay Nutrition Scholars (BNS) Forum and Recognition Day 2023, Nobyembre 21, 2023.

Nahigayon ang kalihokan sa Kaamulan Open Theater, Kaamulan Park, Malaybalay City, Bukidnon.

Gipasabot ni Dr. De Leon ngadto sa gikunsidera nga local heroes – ang BNS, nga ang nutrisyon mahinungdanon nga bahin sa kahimsog ug kalambuan. Ingon niya, nga kini may kalabotan sa pagpauswag sa kahimsog sa bag-ong himugso nga mga bata, ingon man sa mga inahan para sa mas lig-on nga immune system aron makalikay sa risgo sa non-communicable diseases, sama sa diabetes ug cardiovascular disease.

Mipadangat usab sa ilang mensahe-pagsuporta sa programa sa maayong panglawas sila Board Members Minerva Casinabe ug Ranulfo Jose Pepito, Jr.

Gipasalamatan ni Dr. Gary Guido C. Tabios, Jr, Provincial Health Officer si Gov. Roque sa nagapadayon nga mga programa sa Monitoring and Evaluation of Local Level Plan Implementation (MELLPI) Pro.

Butyag niya nga sa lima (5) ka probinsya sa Northern Mindanao, ang Bukidnon lamang ang nagpahigayon sa evaluation ngadto sa component LGUs niini.

Gipaambit sa dinapit nga mamomolong nga si Sherill Faith Espaňola, City Nutrition Program Coordinator sa Cagayan de Oro City ang ilang mga estratihiya o best practices sa pagpatuman sa nutrition program sa dakbayan.

Sa samang higayon, gipasidunggan sa Provincial Government of Bukidnon (PGB) ang mga aktibong lumilihok sa nutrisyon.

Sa 2022 Provincial Outstanding BNS: nag-una ang Barangay Kiara, Don Carlos; gisundan sa Sto. Niňo, Manolo Fortich; Poblacion, Impasugong; Laturan, Libona; ug San Jose, San Fernando.

Sa 2022 Provincial Outstanding Municipal Action Officer, 1. Ang MNAO sa Manolo Fortich, 2. Cabanglasan, 3. Sumilao, 4. Libona, 5. Don Carlos, 6. Maramag, 7. Pangantucan ug San Fernando, 8. Kitaotao, 9. Lantapan, ug 10. Impasugong.

Sa 2022 Provincial Outstanding Municipal Nutrition Committee, top 10 ang mosunod: Sumilao, Cabanglasan, Maramag, Pangantucan, San Fernando, Kitaotao, Impasugong, Lantapan, Talakag, ug Dangcagan.

Samtang Nutrition Honor Awardees ang mosunod nga LGUs: Manolo Fortich, Quezon, Don Carlos, Libona, ug Kadingilan.

Giila usab sa PGB ang kontribusyon sa mga BNS nga nagpahinungod sa ilang kinabuhi sa pagserbisyo sa katawhan sa barangay sulod sa taas nga panahon.

Ang MELLPI Pro mao ang monitoring and evaluation mechanism alang sa pagpatuman sa Philippine Plan of Action for Nutrition sa local level nga gihimo sa matag tuig sa interagency nutrition evaluation team sa national, regional, ug local levels. (PGO-PAIA Division)