Mikabat sa PhP2,048,160.00 nga kantidad sa shabu ang nakuha sa hiniusang police team sa buy-bust operation sa Sayre Highway, Purok 2, Brgy. Poblacion, Valencia City, Bukidnon, pasado alas 11:08 sa gabii sa Nobyembre 10, 2025

Base sa report ni Police Lt. Col. Bryan M. Panganiban, chief of police sa Valencia City Police Station (VCPS), nakorner ang DI Listed nga 35-anyos nga si Alyas Kai, ug ang newly identified drug suspect nga 46-anyos nga asawa niining si Alyas Ani. Sila residente sa Brgy. Muslim Village, Wao, Lanao del Sur.

Si “Kai,” human nahibalo nga police officer ang iyang kaatubang, dayon, tinuyo siyang misupak ug misalikway sa pag-aresto.

Dali siyang mi-drive sa iyang sakyanan aron malikayan ang pagdakop, nga nagpahinabo sa police officer sa pagsaka sa cargo bed sa likod sa Navara pickup truck.

Samtang nagdagan ang pickup truck sa taas nga tulin, wala nay laing kapilian ang police officer kundi pugson ang pagpahunong sa sakyanan pinaagi sa pagpusil sa wala nga likod nga ligid gamit ang iyang issued nga pusil, nga mibuto pagkahuman, hinungdan nga napugos ang suspek sa paghunong.

Ang sakyanan sa suspek mihunong sa Purok 17D, Poblacion, Valencia City, Bukidnon, atubangan sa New Integrated Bus Terminal.

Ang mga nadakpan nga suspek kauban ang mga ebidensya gidala sa Valencia CPS alang sa husto nga pagproseso ug gipasa sa Provincial Forensic Unit sa Malaybalay City alang sa qualitative ug quantitative nga pagsusi.

Mga kaso sa paglapas sa Section 5 ug 11, Art. II sa RA 9165 kon Comprehensive Dangerous Drugs Act of 2002 ang giandam batok sa mga nadakpan nga suspek.

Ang hiniusang police team gilangkuban sa personnel sa Valencia CPS, 1003rd Maneuver Company, Regional Mobile Force Battalion (RMFB) 10 ug City Anti-Drugs Special Unit Team (CADSUT), sa koordinasyon sa Provincial Intelligence Unit sa Bukidnon Police Provincial Office (BPPO). (melbmadera)