Nasayran nga laing milestone sa agrikultura sa Bukidnon ang natimanaan human natugyan ug naabrihan ang bag-ong nahuman nga Php 80.97 milyon Crumb Rubber Processing and Marketing Enterprise sa Purok 1, Barangay Migcawayan, Damulog, Bukidnon, kaniadtong Agosto 29, 2025

Ang project turnover ceremony gitambongan ni Gobernador Rogelio Neil P. Roque, kadagkuan sa DA-RFO 10, DA-PRDP Project Support Office Mindanao, provincial officials, municipal officials sa Damulog, ug uban pang partner agencies.

Ang proyekto gipanag-iya sa Department of Agriculture–Philippine Rural Development Project 10 (DA-PRDP 10) ug natunol kini ngadto sa Migcawayan Tribal Agriculture Cooperative (MTAC).

Kini naglakip og pasilidad nga nagkantidad Php 29.74 milyon, mga makinarya nga nagkantidad Php 27.1 milyon, isa ka delivery truck nga nagkantidad Php 6.45 milyon, working capital nga mokabat Php 10.76 milyon, ug gasto sa site development ug operasyon nga nagkantidad Php 6.90 milyon – nga nikabat sa kinatibuk-an nga Php 80.97 milyon.

Sumala sa Facebook page sa LGU Bukidnon, nalikom ang ₱80,971,551.00 project pinaagi sa investment cost-sharing scheme tali sa World Bank, Government of the Philippines, European Union, ug sa MTAC, uban sa pakigtimbayayong sa PGB ug sa LGU-Damulog alang sa embankment ug site development. (melbmadera)