Hingpit nga gikondena sa Bukidnon Police Provincial Office (BPPO), nga gipangulohan ni Police Col. Jovit L. Culaway, ang brutal nga pagpamusil patay sa duha ka tawo pasado alas 11:44 sa buntag sa Purok 7, Brgy. Vintar, Valencia City, Bukidnon, kaniadtong Setyembre 10, 2025

Ang mga biktima nailhan nga sila Godofredo Macahilig Jardinico ug Jeric Asis Paskin, parehong 45-anyos ug residente sa Barangay Kahaponan, Valencia City.

Sa press statement kaniadtong Setyembre 11, niingon ang BPPO: “Kini nga walay pulos nga pagbuhat sa kapintas walay lugar sa atong komunidad. Gipasiguro namo sa publiko nga among gihimo ang tanang paningkamot aron masuta ug madakpan ang mga suspek niini nga krimen ug madala sa hustisya.”

Nanawagan usab ang BPPO sa publiko nga magpabiling kalmado, mabinantayon, ug kooperatibo pinaagi sa paghatag og bisan unsang impormasyon nga makatabang sa dali nga pagsulbad sa kaso. Gipaniguro sa BPPO, kauban ang ilang mga partner nga law enforcement agencies ug lokal nga pangagamhanan, nga committed sila sa pagpatuman sa balaod ug pagpanalipod sa kalinaw ug kahusay sa Valencia.

Gipakita sa imbestigasyon nga ang mga biktima nagbiyahe sa national road sakay sa isa ka pula nga Honda Click motorsiklo padulong sa San Fernando, Bukidnon, ug kalit silang gipamusil sa wala masayring gidaghanon sa mga suspetsado, nga miresulta sa ilang hinanaling kamatayon.

Nangayo ang Valencia CPS og tabang gikan sa Provincial Forensic Unit alang sa pagproseso sa crime scene, samtang padayon gihapon ang follow-up investigation aron ma-ila ug madakpan ang mga suspetsado. (melbmadera)