Nahulog sa 100 metros nga pangpang ang Hyundai dump truck sa Local Government Unit (LGU) sa Kitaotao, Bukidnon

Ang insidente nahitabo kaniadtong Nobyembre 3, 2025, pasado alas 5:30 sa hapon sa Sityo Kumong ni Pahong, White Kulaman sa Kitaotao, sumala sa report ni Police Major Jose Regner Sevilleno, OIC sa Kitaotao Municipal Police Station.

Ang sakyanan gimaneho sa usa ka 51-anyos nga lalaki, heavy equipment driver sa LGU Kitaotao, nga nagbiyahe gikan sa Brgy. Sinuda paingon sa Brgy. Poblacion, Kitaotao, Bukidnon.

Sumala pa, samtang ang sakyanan nagpaubos sa kurbada nga bahin sa kalsada, gituohang nawad-an og panimuot ang drayber tungod sa usa ka medikal nga kondisyon, hinungdan nga nahulog ang sakyanan mga 100 metros paubos sa bangin.

Gideklarar nga patay ang drayber pag-abot sa Quezon Infirmary Hospital. Ang sakyanan nagpabilin sa ubos sa bangin. (melbmadera)