Ang dakbayan sa Malaybalay uban sa kaabag nga grupo gikatakdang magtutok sa paghatag sa mas maayong serbisyo alang sa congenital patients

Ang maong kalamboan mitumaw human giaprobahan sa Sangguniang Panlungsod ang Resolution No. 2024-0588 nga nagtugot ni Mayor Jay Warren R. Pabillaran sa pagsulod sa isa ka Memorandum of Agreement (MOA) tali sa City Government of Malaybalay (CGM) ug sa CURE Philippines, Inc.

Sumala sa kasayoran, ang MOA naglatid mahitungod sa pre-surgery, surgery ug post-surgery services uban sa pagsuporta ngadto sa mga pasyente nga adunay congenital nga kondisyon.

Nasayran nga human sa masusing pagtuon, atol sa ika 75th regular session niadtong Enero 16, 2024, giduso ni Konsehal Kathleen Cecille C. Pagaling ug hiniusang giuyunan sa konseho nga pagahatagan og pagtugot ang mayor sa pagsulod sa nasangpit nga MOA.

Tungod niini, mahatagan sa pagtagad ang maayong panglawas ang mga kabataan labi na kadtong adunay mga congenital nga kondisyon dinhi sa siyudad sa Malaybalay.

Kaniadtong Nobyembre 24, 2023, ang buhatan sa mayor nag-endorso ngadto sa SP uban sa paghangyo nga pagatugutan si Pabillaran sa pagsulod sa isa ka MOA tali sa CGM ug sa CURE Philippines, Inc. mahitungod sa nasangpit nga serbisyo.

Nasayran nga ang CURE Philippines, Inc. isa ka non-stock, non-profit organization nga nanag-iya ug nag-operate sa isa ka hospital nga ginganlang Tebow CURE Children’s Hospital of the Philippines nga nahimutang sa Davao City.

Sila gahatag sa surgeries ngadto sa mga bata ubos sa 18-anyos ang edad nga adunay congenital condition sama sa bungi, busngi, lip tie, club foot, bowed legs ug uban pang mga deformities.

Ang lokal nga pangagamhanan gimandoan sa paghatag og serbisyo, pagpalambo ug pagprotektar sa katawhan labi na sa maayong panglawas.

Ang CGM maoy gitahasan sa pag-identify sa pasyente, paghatag og venue, pagkaon o snack sa partisipante ug transportation sa pasyente.

Ang duha ka partido miuyon sa uban pang mga termino ug kondisyon nga natala sa nasangpit nga MOA. (SP-NADA/melbmadera)