Pormal nga gibuksan sa Provincial Government of Bukidnon (PGB) ang kasaulogan sa ika-123 nga Philippine Civil Service Anniversary (PCSA) sa tibuok bulan sa Setyembre, dungan sa gipahigayon nga Monthly Convocation nga gi-sponsoran sa Provincial Planning & Development Office (PPDO), Provincial Human Resource Management Office (PHRMO) ug PGO-Provincial Tourism Division, Setyembre 4, 2023 sa Kaamulan Open Theater, Malaybalay City, Bukidnon
Sa mensahe ni Governor Roque gipasalig niini ang pagsiguro ug pagsuporta sa mga programa sa buhatan sa PHRMO alang sa pagpalambo sa kahanas ug professional development sa mga empleyado aron mapadayon ang paghatag sa excellent service ngadto sa publiko. Lakip sa gilantaw niini ang plano sa Bukidnon isip eco-friendly tourism ug ang mga programa sa lalawigan nga maggamit sa insaktong data alang sa mas epektibo ug malungtarong resulta.
Mitambong usab niini si Director Lourdez B. Pelaez sa Civil Service Commission (CSC) – Bukidnon Field Office, kinsa mipasabot nga ang PCSA karong tuiga nagtutok sa paghulma sa mga mamumuo sa gobyerno nga magmalahutayon, sa ingon, mas mapalig-on ang ilang organisasyon ug makahimo sa pagbarug taliwala sa mga pagsulay. Anaa usab ang mga miyembro sa 27th Sangguniang Panlalawigan pinangunahan ni Vice Governor Clive D. Quiño.
Sa maong higayon, gi-presenta ang mga kandidata sa Mr. & Ms. Civil Service 2023 sa matag PGB Clusters. Nakahan-ay usab ang mga kalihukan sa tibuok bulan sa Setyembre ang Outreach Program, Friendly Games, BCSS Orientation, Health and Wellness Activities, Fun Run, Cheer Dance, Indigenous Games, MusikLABAN ug uban pa.
Ang PCSA karung tuiga nagtangag sa tema nga “Transforming Public Service in the Next Decade: Honing Agile and Future-Ready Servant Heroes”, kansang selebrasyon gipaluyuhan sa Civil Service Commission (CSC) ubos sa Presidential Proclamation No. 1050 s. 1997. (LGU Bukidnon)
