Gihangyo sa 27th Sangguniang Panlalawigan si Senate President Juan Miguel F. Zubiri sa paghimo og balaod nga magtukod sa dugang duha ka Regional Trial Court (RTC) Branch, 10th Judicial Regional nga ipahimutang sa lungsod sa Maramag ug Don Carlos, Bukidnon
Gitandi sa 27th SP ang probinsya sa Bukidnon ug Misamis Oriental, basi sa 2020 Population Census sa Philippine Statistics Authority (PSA), nasuta nga adunay dakong diperensya sa kadaghanon sa populasyon sa duha ka probinsya. Diin ang Misamis Oriental aduna lamang populasyon nga 956,900 apan adunay 18 ka RTC Branches, samtang ang Bukidnon, adunay 1,541,308 nga populasyon, apan aduna lamang walo ka RTC Branches.
Mo-ihap ngadto sa 3,685 ang collective caseload sa tibuok RTC sa Bukidnon as of Jan. 2022, diin 3,566 niini ang mga kaso nga natanggong o pending sa RTC Branch 8,9,10,45,46 ug 119 ang pending case sa RTC Branch 11. Samtang as of Sep. 2022, ang pending cases mo-ihap na ngadto sa 3,678, diin 3,589 niini ang gikan sa RTC Branch 8,9,10,45,46 ug 89 ang gikan sa Branch 11.
Gisugyot nga ang RTC Branch nga ipahimutang sa lungsod sa Maramag, adunay territorial jurisdiction unya sa mga lungsod sa Maramag, Quezon, Pangantucan ug Kalilangan, samtang ang lain pa nga RTC Branch nga ipahimutang sa Don Carlos mao usab ang magtutok sa mga kaso gikan sa mga lungsod sa Don Carlos, Kitaotao, Dangcagan, Kibawe, Damulog ug Kadingilan.
Sa maong lakang gikinahanglan usab nga mapahimutang unya ang Prosecutor’s Sub-Office, Public Attorney’s Office, Parole and Probation Office, Bureau of Jail Management and Penology ug Hall of Justice nga magamit sa usa ka RTC sa Maramag ug Don Carlos, Bukidnon, nga gi-inagurahan na niadtong Pebrero 22, 2022 ug Marso 22, 2022.
Gikunsidera sa SP nga kung madugangan ang RTC Branches sa probinsya, mas mapadali ug mapasayon ang paglihok sa kaso, sa ingon, dali na usab ang pagkab-ot sa hustisya. (PR)
