Nakapahimulos og dungog ang 19 ka local government units (LGUs) sa lalawigan sa Bukidnon
human makab-ot ang impresibong passing rate ug mahatagan sa 2025 Good Financial
Housekeeping (GFH) Award sa Department of the Interior and Local Government (DILG)

Lakip sa mga nakadawat sa maong pasidungog ang mga dakbayan sa Malaybalay ug Valencia,
ingon man ang mga munisipyo sa Damulog, Don Carlos, Kitaotao, Kalilangan, Kadingilan,
Pangantucan, Dangcagan, Maramag, Quezon, Kibawe, Manolo Fortich, Cabanglasan, Talakag,
San Fernando, Sumilao, Lantapan, ug Libona.
Sa Facebook post sa DILG Bukidnon, giingon nga kining mahinungdanong kalampusan usa ka
testamento sa dili matarug nga pasalig sa mga lokal nga pangagamhanan sa pagpalambo sa
transparency, accountability, ug maayong pagdumala sa serbisyo publiko.
Matud pa sa ahensya, ang padayon nga dedikasyon sa mga awardee sa pagsunod sa labing taas
nga mga sumbanan sa pagdumala sa panalapi nagsiguro nga ang pondo ug uban pang
kapanguhaan sa gobyerno magamit sa episyente, responsable, ug epektibong paagi alang sa
kaayohan sa ilang tagsa-tagsang komunidad.
Dugang sa DILG Bukidnon, ang ilang nakab-ot dili lamang nagpakita sa kakugi ug integridad
apan nagtakda usab og taas nga sumbanan alang sa lokal nga pagdumala.
Naghinaut sab kini nga ang maong kalamposan makahatag og inspirasyon sa padayon nga
pagtubo, kahusayan, ug makahuluganong pag-uswag sa tibuok probinsya.

Ang Good Financial Housekeeping Award gihatag sa DILG ngadto sa mga lokal nga
pangagamhanan nga nagpakita og maayong performance sa financial administration ug pagsunod
sa mga prinsipyo sa transparent ug responsable nga paggamit sa pondo sa gobyerno.
(melbmadera)