LANTAPAN, Bukidnon — Duha ka Grenade Rifle Fragmentation M76 (HE) rounds ang nakit-
an ug narekober sa daplin sa highway sa Sitio Kimanga, Barangay Kibangay, Lantapan,
Bukidnon, alas-3:30 sa hapon niadtong Sept. 21, 2026.

Sumala sa report, isa ka 30-anyos nga minyo nga mag-uuma ug residente sa Purok 5, Barangay
Basac, Lantapan ang nakamatikod sa isa ka itom nga panapton nga nahimutang sa daplin sa
dalan samtang padulong siya sa iyang uma.
Sa dihang iyang gibuklad ang maong panapton, iyang nakit-an ang duha ka M76 grenade rifle
rounds ug gilayon niya kining gitaho sa mga otoridad.
Mitubag sa insidente ang mga personnel sa 1004th Maneuver Company, Regional Mobile Force
Battalion 10 (RMFB 10) ug mipadulong sa lugar aron susihon ang mga nakit-an nga butang.
Human sa inisyal nga pagsusi, nakumpirma sa mga otoridad ang presensya sa mga explosive
items ug gilayon nilang gisiguro ang lugar aron mapugngan ang mga sibilyan sa pagduol ug
malikayan ang posibleng peligro.

Gipahimangnoan ni PCOL Pobleio Mariano P. Magistrado V, Force Commander sa RMFB 10,
ang publiko nga dili hikapon, ibalhin o hilabtan ang bisan unsang kadudahang butang nga
posibleng explosive ordnance.
Giawhag niya ang mga makadiskubre og susamang butang nga dili kini duolon ug gilayon
ireport sa pinakaduol nga police station o awtoridad aron malikayan ang posibleng kadaot ug
mapreserbar ang kaluwasan sa publiko.
Nakigkoordinar usab ang mga otoridad sa Bukidnon Provincial Explosives and Canine Unit
(PECU) alang sa hustong pagproseso, pag-ila ug luwas nga pagdumala sa mga narekober nga
explosive ordnance.
Ang insidente nagpakita usab sa importansya sa kooperasyon sa mga residente ug law
enforcement agencies sa pagreport dayon sa mga butang nga mahimong hulga sa kaluwasan sa
komunidad. (melbmadera)