Patay ang duha ka babayeng trabahador sa plantasyon sa pinya sa Mt. Kitanglad Agri-
Development Corporation Inc. kon MKADCI samtang naangol ang laing katorse pa human na
crash ang Elf truck nga ilang gisakyan buntag sa Agosto 12 sa Purok 4, Barangay Lurugan,
Valencia City, Bukidnon.

Sumala sa police report, ang mga namatay isa ka 44-anyos nga residente sa Barangay Lurugan
ug 47-anyos nga residente sa Barangay Mailag – tanan sa Valencia.

Ang duha ka babaye gidali pagdala sa duol nga ospital apan gideklarar nga patay na sa pag-abot
nila didto sa mga doktor nga miatiman kanila, samtang ang laing mga nakalingkawas nga mga
bitkima ang gidala sa managlahing hospital sa Valencia.
Base sa pasiunang imbestigasyon sa kapulisan, ang Isuzu drop-side truck nga gipanag-iya sa isa
ka pribadong kompanya naghatod sa mga trabahante ngadto sa field site sa MKADCI dihang
wala kini makasaka sa bakilid nga bahin sa dalan.
Nawad-an og kapit ang ligid sa sakyanan ug miatras kini samtang wala na mogana ang preno,
hinungdan nga naligid kini og tulo ka beses ug nangalagpot ang mga pasahero ngadto sa yuta.
Ang 58-anyos nga drayber sa trak, nga residente sa Purok 9, Barangay Lurugan, boluntaryong
mitahan sa mga awtoridad human sa aksidente ug kasamtangan siyang gitanggong sa Valencia
City Police Station samtang giandam ang tukmang mga kaso batok kaniya.
Samtang, ang manpower agency nga nag-empleyo sa mga trabahante misaad nga mohatag og
bug-os nga pinansyal nga tabang alang sa medikal nga pagtambal sa mga naangol ug sa
galastohan sa lubong sa namatay. (melbmadera)