Aron mapalig-on ang lokal nga industriya sa turismo ug mapalambo ang abilidad sa mga gustong mahimong tour guide, ang City Tourism Office sa Malaybalay, kauban ang Department of Tourism (DOT) – Regional Office 10, malampusong nagpahigayon og pito ka adlaw nga Community Tour Guide Training gikan sa Septyembre 28 hangtod Oktubre 4, 2025

Ang training gilaraw para sa mga indibidwal nga interesado nga mahimong propesyonal nga tour guide, nga nakatutok sa mga city-based tours sulod sa Malaybalay.

Ang programa nagtumong sa paghatag sa mga partisipante og hinungdanong kahanas ug kahibalo aron mapalambo ang kasinatian sa mga bisita, mapauswag ang lokal nga kultura, ug masiguro ang kalidad nga serbisyo alang sa lokal ug internasyonal nga mga turista.

Ang mga sesyon gipangulohan sa mga batid ug DOT-accredited nga regional tour guides, sila ni Ms. Reina Bontuyan ug Mr. Jerome Ubaob. Pinaagi sa ilang halapad nga kasinatian sa turismo, ilang gihisgutan ang mga basikong kahanas sa pag-guide, lakip ang epektibong komunikasyon, pag-atubang sa nagkalain-laing klase sa bisita, safety protocols, storytelling strategies, ug responsableng turismo.

Ang training kabahin sa mas lapad nga inisyatibo sa pag-professionalize sa serbisyo sa turismo sa Malaybalay ug pagsuporta sa tumong sa dakbayan nga mahimong usa ka premier eco-cultural tourism hub sa Bukidnon ug sa rehiyon. (JBBB-City Tourism Staff-NADA Coordinator/melbmadera)