Kaniadtong Enero 14, 2026, pormal nga gitunol sa Local Government Unit (LGU) sa Valencia City, Bukidnon, ang ₱200,000.00 nga cash reward ngadto sa impormante nga nahimong yawe sa pag-ila ug pagkasikop sa pangunang suspek sa pagpatay sa usa ka 15-anyos nga babayeng estudyante

Ang biktima, kinsa giputlan og ulo, nakit-an sa Purok 1, Sityo Sinait, Barangay Dagat-Kidavao sa Valencia City niadtong Enero 8, 2026.

Sumala sa Facebook post sa City Government of Valencia, gipangulohan ni Mayor Azucena “Amie” G. Galario, kauban si Vice Mayor Greizl Galario-Fernandez ug City Spokesperson Jun Galario, ang pagtunol sa maong pabuya. Ang ceremonial nga pagtugyan natigayon sa buhatan sa mayor.

Matod ni Mayor Galario, ang kaisog ug kooperasyon sa impormante nagpakita sa dakong papel sa katawhan sa pagtabang sa mga awtoridad aron makab-ot ang hustisya. Ang dinaliang pagpagawas sa maong pondo nagpakita usab sa lig-ong suporta sa Galario Administration ngadto sa Valencia City Police Station (VCPS) sa ilang kampanya batok sa kriminalidad.

Sumala sa kapulisan, dako ang natabang sa maong cash reward aron mapadali ang imbestigasyon, nga mitultol sa boluntaryong pagsurender sa suspek. Kahinumduman nga ang suspek, kinsa adunay na’y rekord sa kasong murder kaniadto, anaa na karon sa kustodiya sa mga awtoridad human sa iyang boluntaryong pag-angkon sa sala ilalom sa saktong legal nga proseso, ug mag-atubang na sa kasong pagpatay. (melbmadera)