Upat ka balay ang naigo sa sunog sa Purok 1, Barangay Lapok, Talakag, Bukidnon, niadtong buntag sa Enero 11, 2026

Base sa report ni Police Major Kevin P. Bangsoy, chief of police sa Talakag Municipal Police Station, unang nakaresponde sa insidente ang mga personnel sa Bureau of Fire Protection (BFP)–Talakag. Nadeklarar ang fire out pasado alas 10:30 sa buntag, usa ka oras human misugod ang kalayo.

Sumala kang FO2 Neil Dinglasa, fire investigator sa BFP, duha ka balay ang hingpit nga naugdaw (totally damaged) nga gipanag-iya sa usa ka 61-anyos nga babaye ug usa ka 102-anyos nga lalaki. Ang laing duha ka balay usab ang bahin lamang nga naguba (partially damaged) nga gipanag-iya sa usa ka 48-anyos ug usa ka 65-anyos, nga parehong mga babaye.

Gibanabana ang kinatibuk-ang danyos sa sunog nga mokabat sa ₱48,615.00.

Sa dugang nga imbestigasyon, nasuta nga electrical ignition tungod sa arcing ang hinungdan sa sunog. Wala may natalang nasamdan o namatay atol sa maong insidente. (melbmadera)