Pormal nga gipirmahan tali sa Provincial Government of Bukidnon (PGB) ug sa Bukidnon Tagoloanon Mulahay Ha Kabukalagan Agriculture Cooperative ang Memorandum of Agreement
(MOA) alang sa pagpatuman ug pagpalambo sa Bukidnon Carabao Development Program

Sumala sa kasayoran gikan sa buhatan sa gobernador, ang maong pagpirma sa kasabutan
nahitabo sa Governor’s Office sa Capitol Compound sa Malaybalay City niadtong Mayo 14,
2026.
Pinasikad sa kasabutan tali sa PGB ug sa Philippine Carabao Center (PCC), gipalig-on ang
programa nga nagtumong sa pagkonserba, pagpadaghan, ug pagpasiugda sa water buffalo isip
mahinungdanong tinubdan sa gatas ug karne sa probinsya.
Kabahin sa maong inisyatiba, nagkasabot usab ang PGB ug ang BUKTAMACO sa epektibong
pagpatuman sa programa diin ang PCC mag-apod-apod og mga dairy buffalo ngadto sa mga
kwalipikadong farmer-trustees aron mapadasig ang pagtubo ug pagpalambo sa national carabao
industry.
Lakip sa mga benepisyo sa programa ang paghatag og technical trainings ug assistance alang sa
mga mag-uuma, ingon man ang pagtabang sa pagdugtong kanila sa lain-laing government
agencies nga makahatag og tukmang financing ug mga kinahanglanong ekipo.
Gisuportahan usab sa programa ang tibuok value chain development pinaagi sa paghatag og farm
implements, milking equipment, ug mga gamit alang sa pagmintinar sa kalidad sa gatas, lakip na
ang pagproseso ug marketing sa buffalo milk, meat, ug uban pang produkto.
Pinaagi sa maong programa, gilauman nga mas mapalig-on ang industriya sa pag-alima og
kalabaw sa Bukidnon ug madugangan ang panginabuhian sa mga mag-uuma ug kooperatiba sa
probinsya. (melbmadera)